भांगरभूंय | प्रतिनिधी
महापौरः पणजी म्हापालिका मंडळाचो निर्णय
भांगरभूंय | प्रतिनिधी
पणजीः स्मार्ट सिटीच्या कामाक लागून पणजे पे पार्कींग बंद आशिल्लें. 1 जूनाच्यान तें परतून सुरू केलां, अशीं म्हायती महापौर रोहीत मोन्सेरात हांणी दिली.
पणजेच्या चडशा सुवातांचेर गाडयो पार्क करपाक पयशे दिवचे पडटात. पणजे स्मार्ट सिटी खाला चालू आशिल्ल्या कामांचे फाटभुंयेर पणजी नगर म्हापालिका मंडळान राजधानी पणजे 31 मे मेरेन गाडयांक पे पार्कींग शुल्क भरचें पडचें ना, असो निर्णय मार्चांत घेतिल्लो. फाटल्या देड वर्साच्यान पणजे स्मार्ट सिटी खाला कामां चालू आसात. ताका लागून जायत्या वाठारांनी रस्ते खणल्यात. देखून थळाव्या लोकांक तशेंच कामा निमतान येवपी लोकांक गाडयो पार्क करपाक सुवात मेळा नाशिल्ली. जंय जंय सुवात मेळटा थंय लोक गाडयो पार्क करतात. तरी लेगीत तांकां पे पार्कींग खातीर पालिके कडल्यान थारायिल्लें शुल्क भरचें पडटालें. हाका लागून जायत्या वाहन चालकांनी तिडक उक्तायली. देखून महापौर रोहीत मोन्सेरात हांणी स्मार्ट सिटीचीं कामां पुराय करपा खातीर दिल्ल्या 31 मे मेरेनच्या काळा मेरेन चालकां कडल्यान पे पार्कींग शुल्क घेवचें नात असो निर्णय घेतिल्लो. स्मार्ट सिटींची चडशीं कामां आतां पुराय जाल्ल्यान लोकांक गाडयो पार्क करपाक पार्कींग सुवात मेळटली. देखून 1 जूनाच्यान थारायिल्ल्या प्रमाण पे पार्कींग शुल्क सगल्यां वाहनांक भरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
