भांगरभूंय | प्रतिनिधी
पणजी: 2023 वर्स पुश्टीक अन्नधान्य आंतरराष्ट्रीय वर्स म्हणून सगळे कडेन मनयता. ताका लागून ह्या विशयाचेर विंगड विंगड सुवातांचेर जेवणाचे सर्तींचें आयोजन करता. पणजेचे समाजकार्यकर्ती आशा आरोंदेंकार हांणी पणजी सम्राट क्लबाचे मजतीन अशीच एक जेवणाची सर्त आयोजीत केल्ली. विवीध तरेचीं सरबतां, नाश्तो आनी मुखेल जेवण अश्या तीन विभागांनी आयोजीत केल्ले हे सर्तींत पुराय गोंयच्यान बरो प्रतिसाद मेळ्ळो.
ह्या वेळार रुचीक फेम अमिता नायक सलत्री, गृहविज्ञान म्हाविद्यालयाची सहाय्यक प्राध्यापिका वर्षा नायक आनी नामनेचे शॅफ कुणाल आरोलकार हांणी हे सर्तीचें परिक्षण केलें.
ज्वारी, जोंधळे, बाजरी आनी मको ह्या सगळ्या पुश्टीक धान्न्याक आमच्या जेवणांत आदीं सावन आमी म्हत्व दितात. हे खातीर आमचे मदीं उर्जा, तांक निर्माण जाता, अशें अमिता सलत्री हांणी सांगलें.
पणजेच्या ग्लोबल टू लोकल हांगा आयोजीत केल्ले हे कार्यावळींत आशा आरोंदकार हांणी येवकार दिलो. पणजी सम्राट क्लबाचे अध्यक्ष प्रकाश म्हांबरे हांणी उपकार मानले.
ह्या वेळार पणजी सम्राट क्लबाची आदली अध्यक्ष प्रेरणा पावसकार, वांगडी आशा वेर्णेंकार हाजीर आशिल्लीं.
नाश्तो सर्तींत पयलें इनाम प्रिती शेट्ये, दुसरें इनाम विंदा कामत तेली हाका मेळ्ळें. सरबत सर्तींत पयलें इनाम स्नेहा नायक, दुसरें गौरी सालेलकार हाका फावो जालें. मुखेल जेवण सर्तींत पयलें इनाम दिपा खेर आनी दुसरें इनाम सुजाता नाटेकार हांकां फावो जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
