भांगरभूंय | प्रतिनिधी
काणकोण: श्री शारदंबा कृपा कोमरपंत चेरिटेबल ट्रस्टान हालींच पणजेंतल्या झेड स्क्वेर सभाघरांत कोमरपंत समाजांतले उद्देजक आनी अभियंतो मेळाव्याचें आयोजन केल्लें. तातूंत उद्देजक आनी अभियंते अशे मेळून 70 जाण हाजीर आशिल्ले.
मेळाव्याक मुखेल सोयरे म्हूण दुबयचे उद्देजक आनी बेज वास्तू ह्या अभियांत्रिकी कंपनीचे वेवस्थापकी संचालक प्रभाकर नायक, मुखेल सोयरे म्हूण बिट्स पिलानीचे तंत्रीक सहाय्यक आनी दांडेली हांगासरले हॉटेल उद्देजक श्रीनिवास नायक, गोवा अर्बन कॉ ओपरेटीव्ह बेंकेचे वेवस्थापकी संचालक गोपाळकृष्ण नायक, कोमरपंत चेरिटेबल ट्रस्टचे अध्यक्ष आरबीएस कोमरपंत, गोंय क्षत्रीय कोमरपंत समाजाचे अध्यक्ष सुभाष माजाळीकर, मेळाव्याचे निमंत्रक जीके नायक, राजाराम नायक माचयेर हाजीर आशिल्ले.
ह्या वेळार उलयतना प्रभाकर नायक हांणी सांगलें, अशा मेळाव्याची सामकी गरज आसा आनी मेळाव्याक लागून आमी खंय आसात आनी आमकां खंय पावपाचें आसा ती दिशा अशा सुवाळ्यांतल्यान मेळटा. दुसऱ्याच्या विवीध अणभवांतल्यान आमी खंय आनी कशें पावल मारचें तें थारावपाक मेळटा. ह्या वेळार तांणी आपल्या उद्देगा विशींची म्हायती दिली.
श्रीनिवास नायक हांणी उद्देजकता आनी अभियांत्रिकी संबंदी तंत्रीक म्हायती दिली आनी कश्ट घेवपाचो सल्लो दिलो. ह्या वेळार अभियांत्रिकांत पीएचडी डिग्री घेतिल्ल्या डॉ. अमरीता संदीप नायक आनी डॉ. अक्षिता किरणकुमार नायक हांचो मानेस्तां हस्तुकीं भोवमान केलो.
मेळाव्या संबंदी अध्यक्ष आरबीएस कोमरपंत हांणी विचार मांडले. ह्या मेळाव्याक गोंय तशेंच कारवार, बंगळुरू आनी पुणें हांगासरले कोमरपंत समाज भाव, भयणी व्हड संख्येन हाजीर आशिल्ल्यो. कार्यावळीचें सुत्रसंचालन श्रुती नायक हांणी केलें जाल्यार राजाराम नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
