भांगरभूंय | प्रतिनिधी
पणजी: पणजेंत 29 आनी 30 जून दिसा श्री विद्या कोटी कुंकुमार्चान महायज्ञाचें आयोजन केलां. वाराणसीचे पुज्य स्वामी अभिषेक ब्रह्माचारीजी महाराज हांचे हस्तुकीं हो महायज्ञ करतले अशी म्हायती अक्षदा मुळगांवकार हांणी दिली. पणजेंत जाल्ले पत्रकार परिशदेंत त्यो उलयताल्यो. ह्या वेळार नीलिमा मोरजकार, स्निता मोरजकार, वृषाली पार्सेकार आनी सूरज मोरजकार हाजीर आशिल्ले.
महायज्ञा वेळार श्रीयंत्राची पुजा आनी ललिता सहस्त्र नाम जप करतले. पणजेंतल्या श्रीमहालक्ष्मी देवळांत दोन दीस सकाळीं 8.30 ते 1 आनी दनपारां 2 ते 7 मजगतीं महायज्ञाचें आयोजन केलां. एका वेळार 200 बायलांक पुजा करपाची वेवस्था करून दितले. पुजा साहित्याची पुरवण करतले. दोन दीस महाप्रसादाचें आयोजन केलां. ह्या महायज्ञाक गोंयच्यान एक हजारा परस चड बायलो येवपाची शक्यताय आशिल्ल्याचें मुळगांवकार हांणी सांगलें.
राष्ट्रीय प्रगती, गोंयचो सर्वांगीण विकास, संवसारीक शांती आनी वंचितांचें कल्याण ह्या उदात्त उद्देशान हो पवित्र महायज्ञ आयोजीत केला. ह्या दोन दिसांच्या भव्य आध्यात्मीक कार्यावळींत हजारांनी समर्पीत बायलो (सवायशिणी) आनी भावीक वांटेकार जावपाची अपेक्षा आसा. दक्षीण भारत आनी वाराणसी हांगाचे विद्वान पुजाऱ्यांचे हाजिरेंत ह्या विधींत कुंकू अर्पणां सयत एक कोटी (10 दशलक्ष) फावटी श्री ललिता सहस्त्रनामाचो जप करतले.
आतां मेरेन स्वामी अभिषेक ब्रह्मचारीजी हांच्या मार्गदर्शना खाला भारतांतल्या 23 शारांनी हो दिव्य महायज्ञ येसस्वी रितीन जाला. तांणी कश्मीर सावन कन्याकुमारी मेरेन तरणाटे पिळगेक सनातन धर्मा कडेन जोडपाचें पवित्र व्रत घेतलां. स्वामीजी देशभरांत सनातन मुल्यांचें ज्योतिषी म्हूण अथकपणान काम करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
