भांगरभूंय | प्रतिनिधी
दखल घेवपाची गोवा कॅनाची पत्रा वरवीं मागणी
पणजीः पणजे कदंब बस स्टॅण्डार पे पार्कींग सुवातेंत बेवारस सोडून दिल्ल्या गाडयांनी पार्किंगेची म्हत्वाची सुवात आडावन दवरल्या. तशेंच थंय जळारी जावप, उज्याचो धोको निर्माण जावप आनी चोरी जावपाची शक्यताय आसा. ह्यो बेवारस गाडयो पार्कींग शुल्क एकठांय करपी कंत्राटदारान केल्ल्या वायट वेवस्थेची गवाय दितात, अशें गो एनजीओ गोवा कॅन हांणी म्हणलां.
गोवा कॅन हांणी पणजी बस स्टॅण्डा वयल्या पे पार्कींग सुवातेंत बेवारस सोडून दिल्ल्या गाडयां विशीं आपलो हुस्को उक्तायत तांणी कदंब येरादारी म्हामंडळाचे सरवेवस्थापक एम. वाय. पेडणेंकार हांकां पत्र बरयलां.
सद्या पे पार्किंगेची परिस्थिती पळयल्यार कंत्राटदारान सुवातेर सोडून दिल्ल्या गाडयां विशीं दर सप्तकाक अहवाल दिवपाची कसलीच वेवस्था कदंब म्हामंडळा कडे ना. तशेंच, येरादारी पुलीस, जिल्हो पुलीस आनी येरादारी संचालनालयाक लेगीत हाची म्हायती कळीत करिनात अशें आमकां दिसून आयलां, अशें गोवा कॅनान बरयिल्ल्या पत्रांत म्हणलां.
गोंयांत वाडट्या गुन्यांवकारी घडणुकांचे फाटभुंयेर बेवारस सोडून दिल्ल्या गाडयां विशीं संबंदीत अधिकार्यांक योग्य म्हायती दिवप गरजेचें आसा, जेणे करून तांचेर फावो ती देखरेख आनी कारवाय करपाक मजत जातली. तशेंच, ज्या लोकांनी आपलीं वाहनां पे पार्कींग सुवातेंत सोडून दिल्यांत, तांकां तालांव मारप तितलोच म्हत्वाचो आसा, असो सल्लो गोवा कॅन हांणी दिला.
पणजी बस स्टॅण्डा खातीर कदंब म्हामंडळ नव्या कंत्राटदाराची नेमणूक करपाचो विचार करता. पूण नव्या कंत्राटांत सोडून दिल्ल्या गाडयां विशीं अहवाल सादर करपी यंत्रणेचो आस्पाव करप गरजेचे आसा. बस स्टॅण्डा वयली येरादारी आनी पार्कींग वेवस्था सुटसुटीत करून लोकांचे सुरक्षे खातीर हें पावल उखलचें असो उलो गोवा कॅनान मारला.
कदंब म्हामंडळान येरादारी संचालनालय, जिल्हो पुलीस, येरादारी पुलीस, भलायकी संचालनालय आनी उजो पालोवपी दळाच्या अधिकार्यांची जोड बसका आपोवन, एक रिपोर्टींग यंत्रणा तयार करची जेणे करून वेळार कारवाय करप शक्य जातलें अशी मागणी गोवा कॅनान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
