भांगरभूंय | प्रतिनिधी
पणजी : आल्तिना वयल्या फादर आग्नेलो रोड लागसार आशिल्लो क्रॉस मोडून धर्मीक भावना दुखाविल्ल्या प्रकरणांत सतीश सुब्रमण्यम (४०, कुड्डालोर-तमिळनाडू) हाका पणजी पुलिसांनी अटक केल्या. हो प्रकार १९ जुलयाक रातच्या सुमार ९ ते १० वेळा मजगती घडिल्लो.
थळावे नागरीक जोसेफ वाझ हांणी पुलिशेंत कागाळ केली. तांणी दिल्ले कागाळी प्रमाण, अनवळखी मनशान रस्त्या लागसार आशिल्लो क्रॉस मुद्दम मोडून लोकांची धर्मीक भावना दुखयल्या. हे कागाळीच्या आदारार पणजी पुलिसांनी भारतीय न्यायसंहितेच्या कलम २९८ खाला गुन्यांव नोंद केल्लो. पुलिसांनी सीसीटीव्ही फुटेजीच्या आधारार सतीश सुब्रमण्यम हाका अटक केली. ताका पणजी पयलो वर्ग न्यायालयांत हजर केलो तेन्ना, ताचे मानसीक अवस्थेचे फाटभूंयेर न्यायालयान ताका मानसोपचार केंद्रांत (आयपीएचबी) धाडपाचे आदेश दिले.
हडफड्यां काॅपेलांत चोरी
दुसरे घडणुकेंत, २१ जुलयाक सकाळीं ६.२० च्या सुमाराक बागा- हडफडें दर्यादेगेवेल्या सेंट क्रॉस काॅपेलाचें कुलूप तोडून एक लाकडी कदेल चोरून व्हेली. ह्या प्रकरणांत क्रिस्तांव समुदायाच्यो भावना दुखावल्ल्याच्या आरोपा खाला मुंबयच्या विवेक बलवंतराय बत्रा हाका अटक केल्या. ताचे वांगडा आशिल्ल्या १७ वर्सां पिरायेच्या नेण्ट्या कामगाराकूय पुलिसांनी ताब्यांत घेतला.
आदले आयआरएस अधिकारी बत्रा हाचेर गेटीचें कुलूप तोडून भितर प्रवेश केल्ल्याचो आरोप आसा. घडणुके सुवातेर हजर आशिल्ले डायगो फर्नांडीस हांणी हें पळोवन म्हायती दिले उपरांत काॅपेलाचे अध्यक्ष रॉनी फर्नांडीस हांणी हणजूण पुलीस स्टेशनांत कागाळ केली. हे घडणुकेंत मिलाग्रीस सायबीणीची मुर्ती कुशीक दवरिल्ल्याचेंय दिसलें. पुलिसांनी भारतीय न्यायसंहितेच्या कलम ३२९ (४), २९८, ३०५ आनी ३ (५) खाला गुन्यांव दाखल केला. पुलीस निरीक्षक सुरज गांवस हांच्या मार्गदर्शना खाला तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
