भांगरभूंय | प्रतिनिधी
नारायण नायकः मुख्यमंत्री करतले उक्तावण
भांगरभूंय । प्रतिनिधी
पणजीः कदंब म्हामंडळा वतीन सोमारच्यान राजधानी पणजे पांच इलेक्ट्रीक बशी (ईव्ही) बशी सुरू जातल्यो. मुख्यमंत्री डॉ. प्रमोद सावंत हांचे हस्तुकीं दनपारां 12 वरांचेर हे सेवेचें उक्तावण जातलें, अशी म्हायती म्हामंडळाचे सरसेवस्थापक नारायण नायक हांणी ‘भांगरभूंय’ कडेन उलयतना दिली.
पणजी बसस्टॅण्ड- मिरामार- दोनापावल- बांबोळी- सांताक्रूज- पणजी बसस्टॅण्ड आनी पणजी बसस्टॅण्ड- सांताक्रूज- बांबोळी- दोनापावल- मिरामार- पणजी बसस्टॅण्ड अश्या दोन मार्गाचेर सोमारच्यान ईव्ही बशी सुरू करतले. ह्या बशींचें वेळापत्रक सोमारा जाहीर करतले, अशें नायक हांणी सांगलें.
स्मार्ट सिटी प्रकल्पा खाला पणजी शारांतल्या भितरल्या मार्गांचेर ईव्ही बशी सुरू करपाचो निर्णय सरकारान कांय म्हयन्यां आदीं घेतिल्लो. पूण पणजे स्मार्ट सिटीचें काम चालू आशिल्ल्यान ह्यो बशी सुरू करपाक कळाव जालो. पणजेच्या भितरल्या वाठारांतलीं कांय कामां अजून उरल्यांत. ताका लागून पयल्या पांवड्यार फक्त दोनूच मार्गांचेर बशी सुरू करतले. ते उपरांत पांवड्या पांवड्यान भितरल्या मार्गांचेरूय बशी सुरू जातल्यो, अशें नायक हांणी सांगलें.
कंडक्टर नाशिल्ल्यो बशीय बेगिनूच
फुडल्या कांय म्हयन्यांत पणजे कंडक्टर नाशिल्ल्यो ईव्ही बशी लेगीत म्हामंडळ सुरू करतलें. प्रवाश्यांक क्यूआर कोडा वरवीं तिकेट काडून ह्या बशींतल्यान प्रवास करपाक मेळटलो. ते खातीर गरजेचे ते पद्दतीचे बसस्टॉप पणजे उबारपाचें काम चालू आशिल्ल्याचें कदंब म्हामंडळाच्या एका वरिश्ठ अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
