पणजे अंदूं चिखलकालो?

भांगरभूंय | प्रतिनिधी

अंदूं रस्ते खणून दवरिल्ल्यान वा तांचें अजून काँक्रिटीकरण करूंक नाशिल्ल्यान पणजे चिखलकालो जातलोच. पूण कांय सरकारी यंत्रणांक तशें मात पसून जावचें ना, अशें दिसता.

पणजी शार पावसाच्या दिसांनी व्हॅनिस जाता. हें इटलींतलें एक शार. हांगा 150 कानाल आनी मदीं 118 जुंवीं आसात. लोक गाडयां बदला व्हड्यांनी भोंवतात. हें शार पर्यटनाचें खास आकर्शण. सगले कडेन उदकूच उदक. आमचे पणजेकूय कांयशें अशेंच स्वरूप पावसाच्या दिसांनी येता. मळो, जुंता हावस, 18 जून रस्तो, आंबेडकार उद्यान, कांपाल अशा कांय रस्त्यांचेर तर धोंपरभर उदक जाता, तेंय पावसाची दडक वरभर पडल्यार. हाचीं जायतीं कारणां आसात. गटारां तुंबिल्ल्यान उदक व्हांवन वचना, उदक जिरपाक मातयेचो जागोच ना, प्लास्टिक ….! अंदूं केन्ना येवंक ना अशें संकश्ट येतलें अशी भिरांत लोकांनी उक्तायल्या. मात, पावसांत पणजे उदक भरचें ना, हाची सरकाराक खात्री आसा. रस्त्याचीं कामां 30 मेरेन पुराय जातलीं, तसो आदेश काॅण्ट्रेक्टरांक दिला, अशें मुख्यमंत्री डाॅ. प्रमोद सावंत हांणी सांगलां. थळावे आमदार, येणावळ मंत्री बाबुश मोन्सेरात हांणीय उदक तुंबचें न्हय म्हूण झुजा पांवड्यार यत्न चल्ल्यात, अशें सांगलें. मात, सध्याची कामाची गती पळयल्यार, काम फुडल्या 12 दिसांनी पुराय जातलेंशें दिसना. सध्या कांय कडेन सिवरेजीचें काम चलता. पावसान बेगीन घालून घेतलें जाल्यार पणजेकारांचें ‘बारा बिरेस्तार आनी तेरा शुक्रार’ जावं येतात. भविश्य केल्ले प्रमाण, उदक तुंबलें ना तरी सगले कडेन चिखल जातलोच. तातूंत घाणयारें उदक, सिवरेज मिस्तुरात जायत जाल्यार…. तेन्ना स्मार्ट सिटीचीं हीं कामां पावसा पयलीं जावप सामकें गरजेचें. निदान सप्तका भितर जीं कामां पूर्ण करप शक्य आसा, तीं पयलीं हातांत घेवचीं.
स्मार्ट सिटी विशीं राजकी फुडारी सुरवेक सावन प्रतिक्रिया दित आयल्यात. हालींच पावसाच्या दिसांनी पणजे कठीण परिस्थिती निर्माण जावं शकता, अशें बांदकाम मंत्री नीलेश काब्राल हांणी म्हणलां. म्हापौराकूय तशेंच दिसता. सिवरेजीचें काम चलता. जमनी वयलो फोंड कितलीय माती घालून पुरयलो तरी तो मुंगरपाक शकता. सगल्यांत व्हडलें संकश्ट हेंच. कारण हें काम रस्त्याचेर मदीं चलता. अचकीत कितें जाल्यार अपघात जावं येता. तेन्ना सरकारी यंत्रणां वांगडाच नागरिकांनीय सादूर रावचें. पणजेक वयले वयर मेकअप करप आनी सिवरेज येवजण तशीच सोडप समा न्हय. काब्राल हांच्या मतान ती 60 वर्सां परस पोरणी आसा. तातूंत कांय जाणांनी सिवरेज कनेक्शन घेवंक ना. तांचेर आतां कारवाय जावं येता. स्मार्ट सिटीचें काम मुळांत उसरां सुरू जालां. तातूंत तें नियोजनबद्द पद्दतीन जावंक ना. रस्तो खणप सप्टेंबरांत, तातूंत काँक्रिट घालून गटार बांदप डिसेंबरांत, मागीर काम पुराय करून माती ओडप मार्चांत, डांबर घालप मे म्हयन्यांत…. तातूंत प्रत्येक कामाचे काॅण्ट्रेक्टर वेगळे. अशें म्हयन्याचे म्हयने पणजेचें काम चल्लां. काकुलो माॅला मुखार आशिल्ल्या रस्त्याक फेब्रुवारींत वर्स जालें. काम अजून चलता. अंदूं रस्ते खणून दवरिल्ल्यान वा तांचें अजून काँक्रिटीकरण करूंक नाशिल्ल्यान पणजे चिखलकालो जातलोच. पूण कांय सरकारी यंत्रणांक तशें मात पसून जावचें ना, अशें दिसता.
गोंयांत जून ते सप्टेंबर मेरेन चार म्हयने पावस पडटा. फाटलीं तीन वर्सां नोव्हेंबराचे अखेर मेरेन पावस पडला. स्मार्ट सिटीचें काम चार म्हयने बंद करपा परस पावसांत शक्य तें काम चालू दवरल्यार बरें. कारण पावस अदीं मदीं दांडी मारता. कांय वर्सां पयलीं जूनांत 15 दीस पावस पडूंक नाशिल्लो. पावसान आसोर घेतलो जाल्यार स्मार्ट सिटीचें काम करपाक मेळटलें. निदान उदक तुंबता, चिखल जाता, ताचेर काॅण्ट्रेक्टरांक उपाय घेवपाक मेळटले. पणजे सध्या एकाच वेळा बांदकाम खातें, स्मार्ट सिटी, जीसुडा, वीज खातें, टेलिफोन खातें हांचीं कामां चलतात. उदक तुंबल्यार तें उस्पुपाक पंप बी हाडल्यात. पावसाच्या दिसांनी वापरपाक केंद्रीय आपत्ती वेवस्थापन समितीन सचेत मोबायल अॅप तयार केलां. ताचो नियंत्रण कक्ष 24 वरां चालू आसतलो. लोकांनी कागाळ करतकच संबंदीत कामगार थंय येवन मजतकार्य करतले. 108 सेवे सारके तांकां सज्ज रावचें पडटलें. लायट वचप, झाडां पडप, हुंवार येवप, येरादारी ठप्प जावप, असले प्रकार पावसाच्या दिसांनी जाताच. ते बेगोबेग हाताळचे पडटले. गोंय हें सुखवस्तू आनी विकसीत राज्य. पुराय राज्य म्हणल्यार आल्तिनो- पणजी, हे भावनेन कार्य करीत जाल्यार लोकांचेर कोसळपी संकश्टां पयस करप तशें कठीण न्हय.
सरकारान 30 मे पयलीं स्मार्ट सिटींतल्या रस्त्यांची दुरुस्ती सोंपोवपाचें थारायलां, खंयच उदक तुंबचें ना, हाचेंय उतर दिलां. पणजे सरकारी आनी खाजगी कामां खातीर दीसपट्टे हजारांनी लोक येतात. तांकां त्रास, मनस्ताप जावचो ना, हाची योग्य ती खबरदारी घेतल्यार सरकाराक शाबासकी दिवचीच पडटली. चलात तर, पावसाची वाट पळोवया.