पणजेचो फॉन्तेन्हास संवसारांतलो सवो सोबीत वाठार

भांगरभूंय | प्रतिनिधी

‘आर्किटेक्चरल डायजेस्ट’ नेमाळ्यान जाहीर केले इकरा सोबीत वाठार

भांगरभूंय । खबरां मेज

पणजीः पणजेचो फॉन्तेन्हास आनी मळा वाठार सदांच पर्यटकां खातीर एक आकर्शण थारला. घरांची रचना, रंगांची रचना, वास्तुशिल्प, अशीर रस्ते पर्यटकांक आकर्शीत करतात. हाका लागून फाटल्या कांय वर्सांनी ह्या वाठारांक भेट दिवपी पर्यटकांचो आंकडो वाडत आसा. आतां अमेरिकेंतल्या ‘आर्किटेक्चरल डायजेस्ट’ ह्या नेमाळ्यान ही गजाल स्पश्ट केल्या.

नेमाळ्यान हालींच संवसारांतल्या इकरा सोबीत नेबरहूड वा वाठारांची वळेरी जाहीर केल्या. ते प्रमाण पणजेंतलो फॉन्तेन्हास वाठार संवसारांतलो सोबीत वाठार म्हूण सवे सुवातेर आसा. पुर्तुगेज काळांतलीं घरां, बांदकाम शैली, घरांची रचना, रंगाची रचणूक, थंयचे ल्हान रस्ते, लागसारची ल्हान न्हंय हाका लागून हे वळेरेंत फॉन्तेन्हास वाठाराची निवड जाल्या, अशें ‘आर्किटेक्चरल डायजेस्टा’न म्हणलां.

फॉन्तेन्हास हें नांव ‘फॉन्ते फिनिक्स’ (फिनिक्साचे कारंजे) ह्या उतरा वयल्यान आयलां. पुर्तुगेज काळांत दर वर्सा घराक परतून रंगोवप हो नेम आशिल्लो आनी फॉन्तेन्हासांत रावपी लोक आयज लेगीत हो नेम पाळटात. भोंवतणी आशिल्ल्या रंगीत वाठाराचें हें एक कारण. हांगाच्या रस्त्याच्या नांवांनीय पुर्तुगेज उतरां मेळटात, जशीं ‘कोर्टे दी ओइटेरो’ आनी ‘रुआ 31 डी जानेरो रोड’. कांय इमारती जरी इबाडल्यात तरी तांची सोबितकाय अजून तिगून उरल्या. तांबड्या टायल्साचें पाखें, चमकदार रंगाच्यो वण्टीं, बाल्कनी, सोबीत पोर्चेस लक्ष ओडून घेतात. स्मार्ट सिटी खाला फॉन्तेन्हास आनी मळा वाठारांनी वेगवेगळीं कामां जाल्यांत. तातूंत जमनी पोंदच्यान लायटीची लायन घालप, एलईडी दिवे लावप, रस्ते आनी फुटपाथी सुदारप, रंगोवप, भौशीक सुवाती विकसीत करप हांचो आस्पाव जाता. हाका लागून ह्या वाठाराचीय सोबीतकाय वाडल्या. ‘आर्किटेक्चरल डायजेस्ट’ ही संस्था 1920 सावन चलता. ही संस्था आपल्या नेमाळ्यांतल्यान वास्तुकला, पोरणी वास्तुकला, नवीन डिझायन आदी मळार केल्ले अभिनव प्रयोग उजवाडायता. ह्या नेमाळ्यांत संवसारभरांतले नामनेचे वास्तुशिल्पी आनी डिझायनर हांचो आस्पाव आसा. घराची सजावट, भोंवडी, संस्कृताय ह्या विशयांतल्या नव्या प्रयोगांचीय म्हायती ह्या नेमाळ्यांतल्यान मेळटा.