भांगरभूंय | प्रतिनिधी
पणजी ः सुमार साडे चार म्हयने बंद आशिल्लो ताड माड ते सांतिनेजांतल्या घाणयारें उदक प्रक्रिया केंद्रा (एसटीपी) मेरेनचो रस्तो शेनवारा येरादारी खातीर उक्तो केलो. स्मार्ट सिटीच्या कामाक लागून हो रस्तो 18 जानेवारी सावन बंद आशिल्लो. ताचे पयलीं तो देडेक वर्स बंद आशिल्लो. ह्या रस्त्याचें काम पुराय करपा खातीर उच्च न्यायालयान आतां 31 मे मेरेनची मुजत दिल्ली. हो रस्तो परतून सुरू जाल्ल्यान सांतिनेज ते टोंक, मिरामार, करंजाळे वचप सोंपें जातलें. हाका लागून दयानंद बांदोडकर रस्त्यावेली येरादारीची कोंयडी उणी जातली.
हे संबंदीं स्मार्ट सिटीच्या अधिकाऱ्यांनी सांगलें, ताड माड ते टोंक, एसटीपी मेरेनचो 200 मीटराचो रस्तो बांदतना सांडपाणी लायनी घालपाचें काम आव्हानात्मक आशिल्लें. 710 मिमी व्यासाची ट्रंक सीवरेज लायन घालपा वांगडाच हांगा हेर कामां करप गरजेचें आशिल्लें. हातूंत मॅनहोल, घर जोडणी चेंबर, सेवा चॅनल आनी क्रॉसिंग बांदपाचो आस्पाव आशिल्लो. हे सगळी कामां जाल्ल्यान आतां ह्या वाठारांत नितळसाण आनी सांडपाणी वेवस्थापन योग्य जातलें. कामाच्या वेळार उदक आनी वीज सारकिल्ल्यो सेवा अखंडीत दवरपा खातीर वेगवेगळ्या खात्यां कडेन केल्ल्या योग्य समन्वयाक लागून हो प्रकल्प येसस्वी जालो.
हांगाच्या सांडपाणी जोडणीच्या कामाक कळाव जाल्ल्यान रस्तो पुराय जावपाक वेळ लागलो. सांडपाणी लायनी घालतना उदकाची पातळी सतत वयर सकयल जाताली. हे खातीर हांगा पंपाचे आधुनीक तंत्रगिन्यानाचो उपेग केलो. मजगतीं, हांगाचें फामाद देवूळ आनी ताचे कुशीक आशिल्लें वडाचे झाड पुरायपणान आसा तशें उरतले हाची खात्री स्मार्ट सिटीन घेतली. हांगा चलत वचपी लोकांचे सुरक्षिताये खातीर फूटपात जोडून आनी उच्च दर्जाचें काँक्रीट वापरून रस्त्याचो पृश्ठभाग पुराय केलां अशें स्मार्ट सिटीच्या अधिकाऱ्यांनी सांगलें.
हांगाचो सांकव उबारपाकूय बरेच म्हयने लागिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
