भांगरभूंय | प्रतिनिधी
पावंड्या पावंड्यान हेर मार्ग जातले कॅशलेस
पणजी : प्रवाशां कडल्यान सामको उणो प्रतिसाद मेळिल्ल्यान पणजे कॅशलेस बससेवा करपाचो निर्णय कदंबाक स्थगीत दवरचो पडलो. आतां पणजे ते आल्तिनो ह्या एकाच मार्गार कॅशलेस बससेवा करपाचो प्रस्ताव आसा. हाका कसो प्रतिसाद मेळटा, त्या आदाराचेर हेर मार्ग कॅशलेस करपाचो निर्णय जातलो. कदंब म्हामंडळाचे उपसरवेवस्थापक नारायण नायक हांणी ही म्हायती दिली.
कदंब म्हामंडळान पणजे स्मार्ट सीटी खाला विजेचेर चलपी गाडयो सुरू केल्यात. ह्या गाडयांनी ५ डिसेंबर सावन कॅशलेस सेवा सुरू करपाचो प्रस्ताव आशिल्लो. कदंब म्हामंडळान स्मार्ट ट्रान्झिट कार्ड वा युपीआय अॅपा वरवीं तिकीट काडपाची वेवस्था केल्ली. हाका प्रवाशां कडल्यान प्रतिसाद मेळूंक ना. हाका लागून कॅशलेस सेवेचो निर्णय स्थगीत दवरचो पडलो. आतां मेरेन म्हामंडळान ७०० जाणांक स्मार्ट ट्रान्झिट कार्डां दिल्यांत. स्मार्ट ट्रान्झिट कार्ड वरवीं पेमेंट कसो करचो हाचें प्रशिक्षण दिवपा खातीर खासा भुरग्यांची वेवस्था केल्या. हे भुरगे प्रशिक्षण दितले. तशेंच कॅशलेस सेवे विशीं आनीक जागृताय करपाची गरज आसा. लोकांक ट्रान्झीट कार्डा वरवीं पेमेंट करपाची संवय जावपाक जाय.
थोड्या तेंपान पणजी – आल्तिनो ह्या एका मार्गार कॅशलेस सेवा सुरू जातली. ह्या मार्गाचेर ६ बशी चलता. पावंड्या पावंड्यान हेर मार्गाचेर कॅशलेस सेवा सुरू जातली. सगळ्या मार्गांचेर एकसाथ कॅशलेस सेवा सुरू जावची ना, अशें नारायण नायक हांणी सांगलें. तशेंच मोबायला वयल्या टुमोक अॅपा वरवीं वेळापत्रक तशेंच टिकेट बूक करपाक मेळटली, अशें नारायण नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
