भांगरभूंय | प्रतिनिधी
एआय यंत्रणा बंद केल्ल्यान तालांव येवपाक जाता कळाव
भांगरभूंय । प्रतिनिधी
पणजी : मानवी चुकींच्या कारणांक लागून सध्या ट्रॅफीक कॅमेऱ्याचेर नोंद जाल्ले तालांव मॅन्युएल पद्दतीन धाडटात. ह्या कारणांक लागून तालांव पावपाक मात्सो कळाव जाता. जर एआय इंटरग्रेटेड यंत्रणे वरवीं तालांव सुरू केल्यार त्याच वेळार धपक्याक तालांव पावतले. पूण कांय उणावांक लागून ही यंत्रणा सक्रीय करूंक ना, अशी म्हायती स्मार्ट सिटीच्या वरिश्ठ अधिकाऱ्यान दिल्या.
पणजे सयत मेरशी आनी पर्वरी वाठारांत स्मार्ट सिटीच्या स्मार्ट सिटीच्या कॅमेरा वरवीं तालांव दिवप सुरु जालां. पूण येरादारी नेमा मोडले उपरांत हे एआय इंटरग्रेडेट ट्रॅफीक कॅमेरा वरवीं धपक्याक नेम मोडप्याच्या मोबायल फोनार तालांव येवपाक जाय आसलो. पूण हे तालांव एक दीस उसरां येतात. हे विशींच्यो कागाळी रेंट अ कॅब ऑपरेटरांनी येरादारी खात्या कडेन केल्ल्यो. पर्यटक गाडयो चलोवन नेम मोडटात, पूण ते परत गेले उपरांत कॅमेरा वरवीं घातिल्ले तालांव तांच्या हातांत पडटात, अशी कागाळ ओपरेटरांनी केली.
हे विशीं स्मार्ट सिटीच्या वरिश्ठ अधिकाऱ्याक विचारलें तेन्ना तांणी सांगलें, जेन्ना एआय इटरग्रेटेड कॅमेराचो वापर करपाक लागले तेन्ना हो कॅमेरा बारीक चुकींक लेगीत तालांव मारतलो, हे खातीर लोकांचो बोवाळ पडिल्लो. एआय यंत्रणा मनीसपण पळयना. जर सिग्नल पडटा तेन्ना अचकीत ब्रेक मारून गाडी धवे लायनी भायर वता वा हळदुवी लायट पडली, पूण ब्रेक मारप शक्य जायना, फुडें वचपाकच जाय तेन्ना हे एआय कॅमेरा नेम मोडलो म्हूण नोंद करतात आनी थेट तालांव मारतात. सुरवेक खूबश्या जाणांक अशेच तालांव आयिल्ल्यान बरोच बोवाळ जाल्लो. हे खातीर ही यंत्रणा बंद दवरल्या, अशी म्हायती अधिकाऱ्यान दिली.
हे यंत्रणेचे सुवातेर मॅन्युएल पद्दतीन आमी तालांव दितात. एकदां कसलोय नेम मोडिल्ल्याचें कॅमेरान नोंद केले उपरांत तें सिस्टमीचेर येता. थंय स्मार्ट सिटीचो कर्मचारी दरेका फोटवाचो नियाळ घेता. जर नेम मोडिल्ल्याचें स्पश्ट दिसता जाल्यार तो फोटो फुडली कारवाय करपा खातीर येरादारी पुलिशेंक धाडटा. हे प्रक्रियेक लागून तालांव येवपांक एक दीस कळाव जाता, अशेंय अधिकाऱ्यान सांगलें.
सात मदले चार कॅमेरा चालू
सध्या येरादारी सिग्नलाचे नेम मोडिल्ल्याचे नोंद करपी पणजी शारांत सात कॅमेरा आसात आनी तातूंतले फक्त चार चालू आसात. सध्या ह्या कॅमऱ्यांचें कनेक्शन तशेंच हेर यंत्रणा बसोवपाचें काम चालू आसा. जाल्यार ओव्हरस्पीडींग उल्लंघन नोंद करपी तीन कॅमेरा आसात आनी हे तिनूय चालू आसात. जर एकदा ऑनलायन तालांव आयले जाल्यार ताका आव्हान दिवपा खातीर सात दिसांची मुजत आसा. देखून हे विशींची जागृताय जाले उपरांतूच तशेंच हेर कॅमेऱ्यांचें काम पुराय जाले उपरांत एआय इंटरग्रेटेड यंत्रणा सक्रीय जातली, अशी म्हायती अधिकाऱ्यान दिली.
कॅमेऱ्यां खातीर पणजेकार सुरक्षीत
स्मार्ट कॅमेरा सगळ्या जंक्शनार बसयल्यात देखून पणजे शारांत कोण चोरी करता जाल्यार ताचें पळून वचप हें अशक्यूच आसा. जर ह्या कॅमेऱ्यांक वीज तशेंच डेटा जोडणी दिवपी कॅबल कोणी तोडले जाल्यार कॅमेऱ्या भितर 48 वरां खातीर रिकोर्ड करपाची तांक आसा. कॅबल दुरूस्त जाय मेरेन कॅमेरा भितर रिकोर्डींग चालूच उरतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
