भांगरभूंय | प्रतिनिधी
म्हजें मत
गोंयची राजधानी आशिल्लें पणजी शार तोंड दाबून मार सोंशीत आसा. पणजेकारांनी तर सोपूतच घेतला, कितलोय त्रास जालो तरी आमी तोंडांतल्यान मात पसून आवाज काडचे नात. मांडवी न्हय, कॅसिनोंतल्यान भायर सोडटात त्या घाणयाऱ्या उदकान आनी कोयरान बेजारल्या. थंयची मांडवी जणू गटारुच जालां. कॅसिनोनगरींत येवपी जुगारी पर्यटकांच्यो गाडयो इतल्यो येतात की तातूंतल्यान वाट काडीत वचप त्रासाचें आनी धोक्याचें जाता. कदंब बसस्थानकाचे दोनूय वटेन आशिल्ले कोयर विलो प्रकल्प दुर्गंधांत भर घालीत आसात. हालींच्या दिसांनी पुला कडेन पावलो काय दुर्गंध नाकांत घुसता. ताका लागून दुयेंसां जावं येतात.
सकाळीं, सांजवेळा आनी कांय प्रमाणांत दनपरां येरादारीची कोंयडी जाता. खास करून शाळा, कार्यालयां भरपा आनी सुटपाच्या वेळार. हो त्रास उणो म्हणूनच आसत, पणजी स्मार्ट करपाच्या नांवा खाला फाटलीं दोन वर्सां सगले रस्ते खणून दवरल्यात. काम जालें काय माती घालून पुरयल्यात आनी आतां परत तेच खणून दुसरीं कामां चालू केल्यांत. रस्तो खणलो, काम केलें काय तो परत आशिल्लो तसो करपाचो नासता, अशी संबंदीत खात्याची ठाम समजूत आसा. ताका लागून फोंडकुलांतल्यान रस्तो सोदीत गाडी चलोवची पडटा. सर्कस करची पडटा.
स्मार्ट सिटीच्या नांवा खाला सुरू आसात वा जाल्यांत तीं कामां निकृश्ट दर्जाचीं जाल्यांत. खंयचो रस्तो खंय आनी केन्ना मुंगरतलो हाची शाश्वती ना. ह्या कामांक लागून शारांत धुल्ल, माती, धुंवर, शिमीट, फातर, आवाजाचें प्रदूशण वाडतूच आसा. सत्ताधारी पक्षाक लोकांच्या त्रासाचें कांय पडिल्लेंच ना. स्वताक विरोधक म्हणून घेवपी बिळांत लिपून बसल्यात. ह्या शाराक सध्या कोणूच आवय- बापूय उरूंक ना, अशी वायट परिस्थिती आसा. आयाराम, गयाराम, गंगा गये गंगादास, जमुना गये जमनादास, अशें गल्लाभरू राजकारणी.
– गजानन बा. नायक भाटकार,
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
