भांगरभूंय | प्रतिनिधी
शारांत राबितो करतल्यांची चलपा, भोंवपाची संवय मोडटा. तांकां भौशीक येरादारी परस आपल्यो गाड्यो, स्कुटरी पार्किंगाक सुवात मेळपाक जाय.
गोंयचें राजपाटण पणजी बदलतना म्हापालिकेची येणावळ वाडत गेल्या. राजपाटण स्मार्ट जातना स्मार्ट पार्किंग, येरादारी हे दोन मुखेल विशय शारा खातीर म्हत्त्वाचे जाल्यात. पार्किंगाचो विशय सुटावो जाल्यार येरादारीची कोयंडी सुटपाक कळाव लागचोना. भौशीक येरादारी सुविधा चडांच चड उपेगाक हाडपा पासत पणजेकारांक जागोवचें पडटलें. येरादारीची कोयंडी सोडोवपाचो तो एक मार्ग.
म्हापालिकेचे वेंचणुकेंत देंविल्ले नवे उमेदवार शिकिल्ले, पिरायेन ल्हानय आसात. तांकांय उमेद आसा म्हापालिकेच्या आदल्या म्हापौरांवरी वेवसायांतल्यान व्हड जावपाची आनी म्हापौर जावपाचीय. आतांच्या नगरसेवकांनी आपल्या वाॅर्डांतल्यान दुसऱ्या वाॅर्डांत वेंचणुकेंतल्यान पावल दवल्लां. वाॅर्ड ल्हान आशिल्ल्यान नगरसेवक भोंवन, तंत्रगिन्यानाच्या आधारान घराघरांनी प्रचारांत पावंक शकले.
नगरसेवकांक फकत आपल्या वाॅर्डाच्यो न्हय पुराय पणजेच्यो अडचणी, वाठार कळ्ळ्यार 2026- 27 राज्याचो अर्थसंकल्प शारा खातीर उपेगाचो आसा हें कळटलें. अपेक्षा आसा शाराक वर्सा भितर स्मार्ट पार्किंग येवजण, येरादारीचे कोयंडेतल्यान मेकळीक मेळपाची. शारांत भितर येवपाक, वचपाक एका परस चड मार्ग आसात. त्या मार्गांची म्हायती दिवपी तक्टे लावपाक, उपमार्गांक (बायलेन्स) नांवां दिवपाक जाय.
पे पार्किंग खर करतना शारांत भौशीक येरादारीच्यो सुविधा वाडल्यात. शारांत राबितो करतल्यांची चलपा, भोंवपाची संवय मोडटा. तांकां भौशीक येरादारी परस आपल्यो गाड्यो, स्कुटरी पार्किंगाक सुवात मेळपाक जाय. पार्किंग फी एके गाडयेक, स्कुटर मोटारसायकलीक माफ आसची. शारांतल्या एका घराब्यांत चार गाड्यो जाल्यात ते विशीं म्हापालिकेन निर्णय घेवचो पडटलो. नव्या हावजिंग प्रकल्पांनी अंडरग्रावंड पार्किंग वेवस्था आसा. शारांत वेवसाय वाडिल्ल्यान वेवसायिकांच्यो, नोकरी करतल्यांची येरादारीचीं साधनां चड येतात.
शाराच्यो फुडाराची येवजण नवे पद्धतीन करपाची गरज उपरासल्या. शारांतल्या म्हापालिका मार्केटांत शेनवार, आयतार, परबां दिसांनी गर्दी आसता. मार्केटांत गोंयकार वेपारी, व्यान्नी उणे जाल्यात ताचे कारण बापायच्या वेवसायांत येवपाक पुता, धुवांक आवडना. मार्केटांतल्या बिगर गोंयकारांक गोंयकारां परस बरी कोंकणी भास उलोवंक येता, तांचीं भुरगीं कोंकणी बरोवंक शिकून सरकारी कर्मचारी जाल्यां आसतलीं. मार्केटांतल्या पार्किंग सुवातीचो उपेग जावंक लागला, पार्किंगेची आशिल्ली सुवात उणी पडटा. पोरणी मार्केट बिल्डिंग वर्सा दोन वर्सां भितर उडोवन दोनच मजल्याचें मार्केट माॅल सहकार तत्वाचेर बांदपाचो विचार जावचो. स्मार्ट पासयो रस्त्यावरी उपेगांत हाडपीय लोक पणजेंत आसात, गाड्यो पार्क पासयांचेर जातात. नगरसेवकांची खासा समिती वेंचून पार्किंग, येरादारीचे प्रस्न नागरिकांचे मजतीन सोडोवप बरें. स्मार्ट सिटी जातना बसका जाल्ल्यो वेपार, वेवसायिकांच्यो, उद्येजकांच्यो. नव्या सुविधांतल्यान शार येणावळ पाॅयंट करप ही स्मार्ट सिटीची मुखेल मोख आशिल्ली. सरकाराक, म्हापालिकेक ते मोखी मेरेन पावपाक जैत मेळ्ळां, कांय नवे प्रस्न उपरासल्यात.
म्हापालिकेची नवी बिल्डिंग दोन वर्सां भितर आसा त्याच आर्किटेक्चरल डिझायनात बांदपाचो अभ्यास जावचो.
म्हापालिकेंत कर्मचारी भरती, नवे विभाग जाल्यार बरेच प्रस्न सुटावे जावंक शकतात. स्मार्ट सिटीचे जाल्ले बांदावळींतल्यान अडचणी आयल्यात. पावसा आदीं त्यो निस्तारपा पासत वावर नेटान सुरु आसा. अंदूच्या पावसाच्या उपरांत पाटो प्लाझा कडेन वचपी आंबेडकर गार्डनाकडल्या वाठाराची परतून बांदावळ करुन येरादारीची कोयंडी सोडोवपाक जाय. पोरण्या पाटो पुलाचें आॅडिट जावचें, शारा भायल्या उदकाळ वाठाराची राखण करपाची गरज आसा.
विधानसभा वेंचणुके खातीर राजपाटण पणजेंतली वेंचणूक म्हत्वाची तितलीच फोंड्यांतली पोट वेंचणूक नवी दिका दाखोवपी आसतली. गोंयचे आदले मुख्यमंत्री रवी नाईक, देशाचे आदले संरक्षणमंत्री मनोहर पर्रीकार हांचे हे दोन मतदारसंघ. दोगांयनी एकामेकांचेर आरोप केले, एकामेकां आड तिडक उक्तायली, मस्कऱ्योय केल्यो विधानसभेंत, विधानसभे भायरय मर्याद दवरुन. पणजी, फोंडा मतदारसंघांच्या उदरगतींतच न्हय गोंयच्या उदरगतींत दोगांचोय व्हड वांटो आसा. दोन मुख्यमंत्र्यांनी ह्या संवसाराचो निरोप सत्तेंत आसतना घेतलो. दोनय मुख्यमंत्र्यांचे भुरगेपणातले दीस कश्टाचे. लोकजीण सुदारपाक दोगांकय शारांतल्या मतदारांनी तेंको दिलो.
स्मार्ट सिटीच्यो येवजणी चालीक लावपाक पणजेच्यो आदले म्हापौर वैदेही नायक, अशोक नायक, उदय मडकयकार हांचो वांटो आसा. पिराय वाडटना वैदेही, अशोकबाब वगतार वेंचणुकेच्या आंगणातल्यान पयस गेल्यात.
आदले आमदार जे बी गोन्सालवीस हांच्या तेंक्यार संरक्षणमंत्री पणजेंतल्यान वेंचून येताले. शारांतले मतदार तांकां विसरुंक नात, कोविडा तेंपार सरकार, कोयर वेवस्थापनमंत्री बाबुश मोन्सेरात हांचो वावर शार विसरतलें? बाबुश हांच्या तेंक्यान शाराक आनीक स्मार्ट करपी आमदार दिवपाची तयारी प्रदेस भाजपा करता व्हय? नवें आव्हान घेवपाची बाबुश हांची तांची तयारी आसा काय ना तें पणजी म्हापालिका वेंचणूक दाखोवन दितली. गोंयांत भाजपा पासत 2027 त 27 आमदार वेंचून हाडपाक तांकांय पणजे भायर वच्चें पडटलें.
पणजी मतदारसंख्येन ल्हान आसली तरी ओल्ड गोवा, पर्वरी मेरेन मतदार शिंवरल्यात. मतदार वळेरी सुदारपाचो वावर पणजी म्हापालिका वेंचणूक जाल्या उपरांत परतून जातलो. दीसभर पणजे आसपी पणजेकार रातचो म्हापशें, फोंडेकार, मडगांवकारय जावंक शकता. शारांत गोंयां भायले गोंयकार परतून येवंक लागल्यात, हेर राज्यांतले वेवसाया निमतान आयिल्ले पंधरा वीस टक्के नागरीक आसात. शाराच्या कोयर वेवस्थापनाच्या वावरांत आनीक सुदारप करपाक नगरसेवकांनी वावुरपाची गरज आसा. राजकारण कुशीक दवरुन नगरसेवक एकठांय आयल्यार मतदार, नागरीक एकवटान रावंक शकतात. पणजेकार हेरां बराबरीन आंदोलनांत वावुरपी, मेणवातीय पेटोवपाक फुडें सरपी. रस्त्या वयलीं किजिलांय सोडोवन थेट आमदार, म्हापौरां कडल्यान आडमेळीं दाखोवन दिवपाची तांक तांचे लागीं आसा. पणजी बदलता, पणजेकार कित्याक बदलचोना? विरोध करुनय पणजेकार दुसऱ्यांक सुदारपाक उणो पडचोना. तीच देख पणजे म्हापालिकेची वेंचणूक गोंयकारांक घालून दितली शांतीकाय, सवस्तकायेची.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
