भांगरभूंय | प्रतिनिधी
पणजी : स्मार्ट सिटीन बांदिल्ले 135 कोटी रुपयांच्या प्रकल्पांचें एका दिसा भितर उक्तावण केलां. जे टिका करपी लोक आसात तांणी आतांची पणजी आनी पांच वर्सां पयलींचे पणजेची तुळा करची आनी उलोवचें. पणजी स्मार्ट करपाक तशेंच येता ते सीसीपी वेंचणुके खातीर पणजेकारांनी आमकां आदार करचो, असो उलो मुख्यमंत्री डॉ. प्रमोद सावंत हांणी मारला.
शुक्रारा स्मार्ट सिटीच्या स प्रकल्पांचें मुख्यमंत्री डॉ. प्रमोद सावंत हस्तुकीं उक्तावण जालें. हातूंत नुस्तेमारी जेटी, रायबंदर रो-रो फेरी रॅम्पा खातीर बुन्यादी फातर बसोवप, मिरामार ईव्ही चार्जींग स्टेशन, स्मार्ट सिटीच्या मुख्यालयाचें उक्तावण, स्काडा वरवी पणजे खातीर 24 वरां उदका पुरवण करपाचो प्रकल्प आनी पेडेस्ट्रीयन स्पायन ह्या प्रकल्पांचें उक्तावण जालें. ह्या वेळार महसूल मंत्री तशेंच पणजीचे आमदार बाबूश मोन्सेरात आनी स्मार्ट सिटीचे सीईओ तशेंच वेवस्थापकी संचालक संदीप जॅकीस हजर आसले.
फाटलीं तीन वर्सां पणजेकारांनी जे त्रास सोंसल्यात वा अपघात जाल्यात ते खातीर हांव दुख्ख व्यक्त करतां. स्मार्ट सिटी खाला आतां 35 प्रकल्प पुराय जाल्यात, अशें मुख्यमंत्र्यान सांगलें.
स्काडा खाला 24 वरां खातीर ओपा सावन पणजे स्मार्ट सिटीक उदक पंप करून पणजे ताचें शुध्दीकरण जातलें आनी स्मार्ट मिटर आशिल्ल्या 3 हजार घरांनी ताची पुरवण जातली. फुडारांक जीं उरिल्लीं 6 हजार घरां आसात तांचे मिटर स्मार्ट मिटरात बदलतले, अशें मुख्यमंत्र्यान जाहीर केलें.
सा पेंद्र आनी दिवाडे रो रो फेरी खातीर रॅम्पाचो विस्तार करून ह्या मार्गार नोव्हेंबर मेरेन रो-रो फेरी घालपाचें थारयलां. दिवाडेच्या लोकां खातीर खूब बरो उपयोग जातलो. दिवाडेंच्या लोकांची ही कितल्याश्याच वर्सां सावन मागणी आशिल्ली, अशें मुख्यमंत्र्यान म्हणलें.
पीपीपी तत्तावचेर फाटल्या एका म्हयन्या भितर 18 चार्जींग स्टेशनां प्रायोगीक तत्वाचेर चलयलीं. ह्या स्टेशनांचो वापर करून गाडयो 5 लाख किलोमीटर इतल्यो चल्ल्यो आनी 32 टन इतलें कार्बन एमिशन उणें जालें. स्मार्ट पणजी खातीर केंद्र सरकाराचे दोन पुरस्कार फावो जाल्यात आनी खऱ्या अर्थान पणजी आमी स्मार्ट करपाक शकले, अशें मत मुख्यमंत्र्यान मांडलें.
कला अकादमी ते अदील शहा पॅलेस मेरेनच्या रस्त्यार पोरण्या झाडांचे सुवातेचेर नवीं झाडां आमी लावपाक घेतल्यात. जैवविविधताय मंडळान सगल्या झाडांचें मॅपींग केलां. जैविविधताय मंडळा वांगडा काम करून स्मार्ट सिटी हीं झाडां 100 वर्सां तिगोवपाचें आनी तांची देखरेख करपाचें काम करता. पणजेंत शिंयाळें वातावरण उरचें हे खातीर आमी व्हडा प्रमाणांत झाडां लायतात, अशें मुख्यमंत्र्यान सांगलें.
पणजी नितळ, पाचवेगार आनी प्रदुशण मुक्त दवरपा खातीर पणजेकारांनी स्मार्ट सिटी आनी सरकाराक आदार दिवचो. जे लोक पयलीं टिका करताले तांणी दोना पावल ते रायबंदर मेरेन शाराचो नियाळ घेवन पांच वर्सांची पणजी आनी आतांचे पणजेचो नियाळ घेवचो. बरीं उतरां आनी वायट उतरांक आमी येवकार दितात, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
