भांगरभूंय | प्रतिनिधी
शाराक गरज आसा शिस्तीची, शिस्तीन वाडिल्ले नगरसेवक मेळ्ळ्यार पणजेंतले सगले प्रभाग स्मार्ट जातले.
पणजेच्यो आदल्यो म्हापौर वैदेही नायक पुस्तकोत्सवांत मेळ्ळ्यो. पयलींच्यो यादी जाल्यो. तांचे वरी एक बळिश्ट अस्तुरी म्हापौर परतून एकदां पणजेक किद्याक मेळची न्हय?
उंचेलें शिक्षण घेतिल्ल्यो, स्वतंत्र विचारांच्यो, शारांत चलत भोंवपी वैदेही. प्रदेश भाजपाच्या अस्तुरी विभागांतल्यान त्यो व्हड जाल्ल्यो. प्रशासकी कामकाजाचो अणभव तांकां आसा, शारय तांच्या वळखीचें. स्मार्ट सिटी येवजण फुडें व्हरपांत तांचो व्हड वांटो. राज्य महिला आयोगाच्या वावराची संद तांकां मेळिल्ली. आयजय त्यो पणजी म्हापालिकेक बरें नेतृत्व दिवंक शकतात. समेस्तां मदीं वचपाची, बसपाची, विचार मांडपाची तांक तांकां आसा. म्हापालिकेंतलो तांचो प्रभाग अस्तुरे खातीर राखीव जाला. संजीव नायक हांच्या तेंक्यान त्यो वेंचून येवंक शकतात.
पणजी म्हापालिकेचे नगरसेवक जावपाकय आयज सर्त आसतली. नवे वाटेन, नवे दिकेन वचपी म्हापालिकेक अणभवी म्हापौर मेळ्ळ्यार विधानसभा वेंचणूक प्रदेश भाजपाक सोंपी जातली. वर्सावळीचे नगरसेवक, तांचे उत्तराधिकारी मतदारांक सदांच भावतले अशे न्हय. मतदारांक आपल्यो अडचणी सांगूंक मेळपी प्रभागांतलो, प्रभागांतल्यो सुविधा सुदारपी नगरसेवक जाय आसता. उदक, रस्ते, कोयर वेवस्थापन, येरादारी हे फक्त विधानसभा वेंचणुकेचे विशय न्हय. ते नित्याचे, म्हापालिका वेंचणुकेचे विशय आसात. राजपाटणांत व्हड थळांतर जालां, चिंबलाच्या तोयार तळ्या मेरेनच्या लागसारच्या वाठारांत पणजेकार पावल्यात. पर्वरेच न्हय जाल्यार राज्यांतल्या हेर तालुके, मतदारसंघांनी पणजेकार लग्नान, वेवसायांतल्यान रावतात. पणजी स्मार्ट जातना ते मुळां सोदपाक येतात तेन्ना तांचेय इश्ट, दुस्मान बदलतात. शारांतल्या कोयर वेवस्थापनातल्या वावरांत आशिल्ले नगरसेवक जातात शिक्षणान, राजकी तेंक्यान. कितलो तेंप ते तिगूंक शकतात? तांची वळख तांच्या प्रभागातली, पुराय शाराक ते कितले वळखतात? शारांतलें प्रदुशण आवाजाचें, धुल्लाचें, येरादारीचें, संस्कृतायेचें वाडटा तेन्ना तें पयसावपी म्हापौर पणजेक मेळपाची गरज आसा.
फाटल्या वीस बावीस वर्सांत पणजी बदल्ल्या, कसिनोर येवपी चोंब्यांच्या घुस्मटांतल्यान पणजेक भायर काडचीच पडटली. कसिनो रेगुलेटरी आॅथोरेटी कायद्यांत बांदिल्ली आसा, चालीक लावपाचें उतर म्हापालिका वेंचणुके वेळार दिवचें पडटलें.
आयएएस अधिकारी संजीत राॅड्रिग्जा वरी आयुक्त म्हापालिकेक जाय. शारांतल्या मांडवी न्हंयेच्या लागसारच्या वाठारांत आशिल्ल्या जार्दिन्याक नवें रुप दिवपाक कळाव कित्याक? बालभवना लागसारचो परेड ग्रावंड कोयराच्या राशींतल्यान भायर सरून सोबीत जाला. दयानंद बांदोडकार ग्रावंडाक नवें रुप दिवपाची गरज आसा. बदलपी हवामानाचो (क्लायमेट चेंज) अभ्यास करून.
तें म्हाका कांयच लागना, स्मार्ट सिटीचो वावर तो अशें म्हणल्यार म्हापालिकेची जापसालदारकी सोंपची ना, स्मार्ट सिटी वेवस्थापनाक जागें करचें पडटलें.
म्हापालिकेन कोयर वेवस्थापनांत बरो वावर केला. शारांत 100 टक्के नितळसाण हाडपाची, प्लास्टीक पोतयो 100 टक्के ना करपाची मोख दवरची पडटली. म्हापालिकेंत म्हापौराची संगीत खुर्ची नाशिल्ल्यान आनीक बरें कामकाज जावंक शकता. म्हापालिकेचे बिल्डिंगेची बुन्याद घाली, फुडल्या दोन वर्सां भितर बिल्डींग तेच सुवातींत जावची, त्याच डिझायनांत, रुपांत.
म्हापालिका कायदो केल्ले नेमावळींतल्यान फुडल्या स म्हयन्या भितर चालीक लागचो. नगरविकास मंत्री विश्वजीत राणे हांकां पणजी नवी न्हय, ते पणजेंत शिकिल्ले, व्हड जाल्ले. मात्शे पणजेंत भोंवल्यार प्रशासन स्तंभा पासत सरकाराक सुवात ते दाखोवंक शकतले. नगरपालिका प्रशासनाक नवी कचेरी मेळ्ळ्या, पाटो प्लाझा वयल्यो कोयराच्यो राशी बिल्डिंगे पोंदा गेल्यात. शारांत भौशीक सुवातीतलीं झाडां आयजय आसात, सावळी दितात. सरकाराची उजो पालोवपी दळाची नवी कचेरी मार्गाक लागल्या. फुडल्या तीन वर्सां भितर मुखेल रस्ते रुंद, स्मार्ट करपाचो वेंचणूक अजेंडा आसचो.
नगरसेवक नळ्यांच्या घरांतल्यान बिल्डिंगेत रावपाक गेल्यात, तांची जिणेशैली बदल्ल्या. उदरगतींतल्यान अस्तुरी नगरसेवक स्वयंसिद्ध जाल्यात, स्वयंपूर्ण जावपाचो मार्गय त्यो शेजाऱ्यांक दाखयतात.
आंदोलनातली कालची पणजी आयज येणावळ पाॅयंट जाल्या, ती ग्रेटर जाल्या, जातली. शारांत म्हाविद्यालयां नव्या रुपांतल्यान परतून हाडप, सहकार भांडाराचें सहकार माॅल करप म्हापालिका वेंचणुकेच्या जाहीरनाम्यांत उतर मेळचें. म्हापालिकेच्या बाजाराचो तिसरो पांवडो बांदपाची तयारी जातना नवो पार्कींग प्लाझा दिवपाची तजवीज आसची.
शारांतल्या मुखेल रस्त्यार स्मार्ट ई बशी भोंवतात, वेळापत्रकांत सुदारणा जावपाक जाय. शाराक गरज आसा शिस्तीची, शिस्तीन वाडिल्ले नगरसेवक मेळ्ळ्यार पणजेंतले सगले प्रभाग स्मार्ट जातले.
म्हापौर रोहीत मोंसेरात दुसऱ्या प्रभागांतल्यान वेंचून येवंक शकतात, वेंचणुकेच्या आंगणांत ते आसतले. दुबावा विरयत 25-26 उमेदवारांक भाजपा पंगडातल्यांन ते वेंचून हाडटले बापूय, सरकाराच्या तेंक्यान. ताळगांवां तांचो प्रभागूच न्हय हेर प्रभागांक स्मार्ट सिटींतल्यान लाव कसो मेळ्ळा तें सांगतले. बापाय परस चड शिकिल्ल्या रोहीत हांणी म्हापौर म्हणून कसिनो शारा भायर धांवडावपाक सरकाराक पत्र बरोवचें. मांडवीत व्हडलो कसिनो येता म्हणून शारांत बोवाळ आसा, पणजेकारांक खुबळावपाचे यत्न जातात. कोयर वेवस्थापन मंत्री आतानासियो (बाबूश) मोंसेरात हांणी सत, फट कितें तें मुख्यमंत्र्यांक मेळून शारांतल्या लोकांक सांगचें. कसिनो शारा भायर व्हरपाचें उतर बाबूश हांणी मतदारांक फाटले विधानसभा वेंचणुकेंत दिल्लें. त्या उतराक पाळो दिवचो, नवे कसिनो मांडवींत नाका अशें पत्र बरोवन सरकाराक तांणीय कळोवचें.
गोंयचें राजकारण पांच- सात वर्सांत व्हड प्रमाणांत बदल्लां, पणजी बदलपी राजकारणांत फाटीं कशी उरतली? पक्षांतर करपी बाबूश भाजपांत थिरावतात, शाराक थिराय दीत आपली घरकान्न आमदार जेनिफर मोंसेरात हांच्या मतदारसंघाक येवजण्यांचो लाव मेळोवपाक ते अनमननात.
लैंगीक अत्याचाराच्या प्रकरणांत बाबूश निर्दोश थारल्यात. सरकारांत ते मंत्री आशिल्ल्यान सरकार ह्या प्रकरणांत न्यायालयांत आव्हान दिवपाची शक्यताय उणी आसा. चॅलेंज करपी आप वावुरपी कार्यकर्ते आसुये. म्हापालिका वेंचणूक लागीं आयिल्ल्यान न्यायालयाच्या निवाड्याक म्हत्व आसा.
आम आदमी पार्टीचे प्रदेशाध्यक्ष वाल्मिकी नायक, वांगडी मेलिसा सिमाॅयश, सिसील राॅड्रिग्ज म्हापालिका वेंचणुकेंत देंवत व्हय? आम आदमी पार्टीच्या राजकारणाक वेगळी वाट म्हापालिकेंतल्यान मेळूंक शकता. प्रदेश काँग्रेस, आम आदमी पार्टी, रिव्होल्युशनरी गोवन्स पार्टी, गोवा फाॅरवर्ड एकठांय आयल्यार सर्त वाडटली, जैत पयस.
उत्पल पर्रीकार म्हापालिका वेंचणुकेंत काँग्रेसी वांगडा वतले अशें दिसना. तांणीय म्हापालिका वेंचणुकेच्या आंगणांत देंवपाचो अणभव विधानसभा वेंचणूक लागीं आयल्या तेन्ना घेवचो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
