भांगरभूंय | प्रतिनिधी
कदंबाचो निर्णय : पावंड्या पावंड्यान हेर मार्ग जातले कॅशलेस
भांगरभूंय । प्रतिनिधी
पणजी : प्रवाशां कडल्यान सामको उणो प्रतिसाद मेळिल्ल्यान पणजेंत कॅशलेस बससेवा करपाचो निर्णय कदंबाक स्थगीत दवरचो पडलो. आता पणजी ते आल्तीन ह्या एकाच मार्गार कॅशलेस बससेवा करपाचो प्रस्ताव आसा. हाका कसो प्रतिसाद मेळटा, त्या आदाराचेर हेर मार्ग कॅशलेस करपाचो निर्णय जातलो. कदंब म्हामंडळाचे उपसरवेवस्थापक नारायण नायक हांणी ही म्हायती दिली.
कदंब म्हामंडळान पणजेंत स्मार्ट सिटीखाला विजेचेर चलपी गाडयो सुरू केल्या. ह्या गाडयांनी 5 डिसेंबर सावन कॅशलेस सेवा सुरू करपाचो प्रस्ताव आशिल्लो. कदंब म्हामंडळान स्मार्ट ट्रान्झीट कार्ड वा यूपीआय अॅपवरवी तिकीट काडपाची वेवस्था केल्ली. हाका प्रवाशां कडल्यान प्रतिसाद मेळूंक ना. हाका लागून कॅशलेस सेवेचो निर्णय स्थगीत दवरचो पडलो. आतां मेरेन म्हामंडळान 700 जाणाक स्मार्ट ट्रान्झीट कार्डां दिल्यात. स्मार्ट ट्रान्झीट कार्डा वरवीं पेमेंट कसो करचो हाचें प्रशिक्षण दिवपा खातीर खासा भुरग्यांची वेवस्था केल्या. हे भुरगे प्रशिक्षण दितले. तशेंच कॅशलेस सेवे विशीं आनीक जागृताय करपाची गरज आसा. लोकांक ट्रान्झीट कार्डा वरवीं पेमेंट करपाची सवंय जावपाक जाय. थोड्या तेंपान पणजी – आल्तीन ह्या एका मार्गार कॅशलेस सेवा सुरू जातली. ह्या मार्गाचेर 6 बशी चलतात. पांवड्या पांवड्यान हेर मार्गाचेर कॅशलेस सेवा सुरू जातली. सगळ्या मार्गांचेर एकाच वांगडा कॅशलेस सेवा सुरू जावची ना, अशें म्हामंडळाचे उपसरवेवस्थापक नारायण नायक हांणी सांगलें. तशेंच मोबायलाचेर टुमोक अॅप डावनलोड करपा विशीं लेगीत जागृताय करतले. टुमोक अॅपा वरवीं वेळापत्रक तशेंच तिकेट बूक करपाक मेळटली. हाची म्हायती प्रवाशांक दितले, अशें म्हामंडळाचे उपसरवेवस्थापक नारायण नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
