पणजेंतली पार्किंग

भांगरभूंय | प्रतिनिधी

टॅक्सी हें आतां अप्रूप उरूंक ना. गोंयांत तरी. दरेका घरांत मोटार आसा. पयस खंय वचपाचे जाल्यार भाड्याची टॅक्सी करपी गोंयकार आसात. चडशे पर्यटक तर टॅक्सीच वापरतात. सवाय भाडें आशिल्ली ओला, उबेर टॅक्सी सेवा आशिल्ली जाल्यार टॅक्सीच्या गिरायकांचो आंकडो बरोच वाडपाचो. सध्या टॅक्सीकार परत उजवाडांत आयल्यात. हे खेपे तांणी राजधानी पणजे शारांत टॅक्सी पार्किंगाक परवानगी दिवची. आमी भाडें दिवपाक तयार आसात, अशें निवेदन तांणी जिल्होधिकाऱ्याक दिलां. शारांत टॅक्सी पार्किंगाचेर बंदी घालपी अधिसुचोवणी हालींच भायर सरल्या. सध्या पणजे स्मार्ट सिटीचें काम चलता. शारांत टॅक्सी येत जाल्यार पार्किंगाची समस्या उबी जातली, अशें सरकारी यंत्रणेक दिसता. ताका लागून ही बंदी घाल्या, अशें टॅक्सीकारांचें मत. महापालिकेन हाचेर उपाय काडपाक जाय. कारण ताचो पर्यटन मळाक, मुखेल म्हणल्यार टॅक्सी वेवसायाक धपको बसूं येता.
आमी पर्यटकांक घेवन येतात. ते भोंवून येता म्हणसर गाडयो खंय पार्क करपाच्यो तो प्रस्न उबो रावला. पयलीं भौशीक पार्किंग सुविधेंत पार्क करताले. ताचें भाडेंय दिताले. अधिसुचोवणे उपरांत आमकां टॅक्सी पार्क करपाची परवानगी दिवंक ना. मात आरटीओ अडेज हजार रुपयां मेरेन तालांव दिता, अशें टॅक्सीधनी संघटनेच्या अध्यक्षांचें म्हणणें. पणजे पर्यटक खास करून फोन्तेन्हास, कॅसिनोनी येतात. चडशे वर, दोन वरां रावन परत वतात. म्हणटकच तो मेरेन गाडी दवरची पडली. पूण ती पार्क करपाची खंय हो प्रस्न. आमकां दोन- तीन दिसांनी भाडें मेळटा, तेन्ना तातूंतलो देड- दोन हजार रुपयांचो व्हडलो वांटो तालांव म्हूण दिवप परवडपाचें ना. देखून जिल्होधिकाऱ्यांनी हाचेर कितें तरी उपाय काडचो, अशी तांची मागणी.
पणजे फाटलीं 3- 4 वर्सां स्मार्ट सिटीचें काम चलता. तें फुडल्या वर्सा मेरेन पुराय जातलें, काय आनीक दोन वर्सां लागतलीं, तें सांगपाक येना. ‘तारीख पे तारीख’ हो डायलाॅग पसून लजतलो इतले फावट हें काम मुखार गेलां. स्मार्ट सिटीचे अधिकारी, आमदार, मंत्री, नगरसेवक तारखेचेर तारखो दित रावल्यात. खणिल्ल्या जाग्यांचेरुय परत खणप चालू आसा. ताचो धपको टॅक्सीकारांक बसला. तांकां टॅक्सी पार्क करच्यो न्हय, म्हूण कळयलां, अशें ते म्हणटात. पळोवंक गेल्यार पणजे पार्किंगाची समस्या तशी पयलीं सावन. कांय वाठारांनी तर पार्किंग मेळप म्हणजे लाखांनी रुपयांची लाॅटरीच लागपा सारकें. लोक सकाळीं साता पयलींच येवन पार्किंग करतात काय कितें, असो दुबाव येवपा सारकी परिस्थिती. पणजे पार्किंग मेळना, ताका कारण मोटारींचो वाडिल्लो आंकडो. पूण सोबितीकरणाच्या नांवा खाला फुटपाथांची रुंदाय वाडयिल्ल्यान, फुलांचीं रोपां लायिल्ल्यान जागो उणो जाला. देखून त्या जाग्यार पार्किंग केल्यार रस्तो आडावता. सोबितीकरणाच्या कामा पयलीं गाडी देड- दोन मिटर भितर उबी करपाक मेळटाली. शारांत पार्किंग इमारत आसा, पूण ती गांवां भायर. थंय गाडी पार्क केल्यार मार्केटांत वचपाक अडेच किलोमिटर चलत वच्चें पडटलें. तरीय हालींच्या कांय वर्सांनी थंय लोक मोटारी दवरपाक लागल्यात. आतां पालिकेन सगले कडेन पार्किंगे खातीर पयशे घेवप सुरू केलां. कांपालार हालींसराक हळडुवें जॅकेट घाल्ले कामगार दिसतात. ते सकाळीं 10 ते सांजवेळा 5 जाय मेरेन पार्किंग करपाक 100 रुपया मागतात. ताकाच लागून घडये आतां बालभवन ते हायर सेकंडरी मेरेनच्या पार्किंग जाग्यांत गाडयो उण्यो दिसपाक लागल्यात. थंय सांजवेळा भेळपुरीचे गाडे उबे रावपाक लागल्यात. वास्तविक भौशीक वेवस्था सारकी नाशिल्ल्यान लोक गाडयो घेवन येतात.
पणजे शारांत खाजगी बसी, ई- बसी भोंवतात. मात, राज्याच्या साबार तालुक्यांनी बसींचो आंकडो खूब उणो जाला. पणजी बसस्टॅण्डार सकाळीं, सांजवेळा उबो रावल्यार येरादारी अधिकाऱ्यांक हें स्वता पळोवपाक मेळटलें. सण, परबो, आयताराक तर बसी सुशेग घेतना दिसतात. हातूंत फक्त खाजगी बसीच न्हय, तर कदंबाय आसात…. परिणाम? खाजगी चारचाकी, दुचाकींचो आंकडो वाडला. खरें म्हणल्यार स्कूटर ही येवन- वचून तिशेक किलोमिटर चलोवपाची. 60- 70 किलोमिटर चलोवपाचें तें वाहन न्हय. अपघातूय वाडल्यात. पार्किंगे खातीर अशें चडावत शुल्क घेवपाक लागले, हजारांनी रुपया तालांव दिवपाक लागले जाल्यार कशें जातलें?
खरें म्हणल्यार, पार्किंगची सुविधा फुकटांत मेळपाक जाय. ते खातीर शारांनी खाशेले जागे तयार करूंक फावो. पणजे मैदानांचो वापर जाता. मात आतां तींय नश्ट जावंक लागल्यांत वा दुसऱ्या कामां खातीर ताचो वापर वाडला. टॅक्सीकारांनी पणजे शारांत पार्किंग करपाक परवानगी मागल्या.
ताचेर विचार करचो. म्हापालिका, येरादारी खात्यान तांचे वांगडाच, हेर लोकांच्या पार्किंगाचेरुय विचार करचो. गाडी फक्त गिरेस्त लोकां कडेच आसता, हो गैरसमज मनांतल्यान काडून उडोवचो.