भांगरभूंय | प्रतिनिधी
तिसवाडी तालुको बुद्दीबळ संघटने वतीन गोंय बुद्दीबळ अस्थायी समिती आनी अखील भारतीय बुद्दीबळ म्हासंघाचे मान्यतायेन तिसरी अखील भारतीय उक्ती फिडे मानांकन बुद्दीबळ सर्त 30 ऑक्टोबर ते 3 नोव्हेंबर मेरेन पणजेच्या इन्स्टिट्यूट मिनेझीस ब्रागांझा सभाघरांत चलतली.
धेंपो उद्देग समुहान सर्त पुरस्कृत केल्या. वट्ट 3.60 लाख रुपयांचीं इनामां दितले. हातूंत उक्त्या गटांतल्या पयल्या 57 खेळगड्यांक, वॅटरन्स, बायलो, 7 ते 15 वर्सां पिराये गटांतले खेळगडे धरून वट्ट 72 जाणांक रोख इनाम भेटयतले.
सर्तींत भारता सयत रशिया आनी हंगेरींतल्या खेळगड्यांनी लेगीत प्रवेशिका सादर केल्यात. 26 ऑक्टोबर सांजेच्या पांच वरां मेरेन प्रवेशिका स्विकारतले. ताका लागून वांटो घेवपी खेळगड्यांची संख्या वाडपाची शक्यताय आसा.
राज्यांतल्या खेळगड्यांनी वांटो घेवपा संदर्भांत दत्ताराम पिंगे वा अरवींद म्हामल हांचे कडेन संपर्क सादचो अशें कळयलां. हे सर्ती वरवीं राज्यांतल्या नवोदीत बुद्दीबळ खेळगड्यांक फिडे मानांकन मेळोवपाची संद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
