भांगरभूंय | प्रतिनिधी
पणजी गट कॉंग्रेसीचें निवेदन
पणजीः ३१ मार्च पयलीं कामां पुराय जाल्यांत हो दावो करपी स्मार्ट सिटीन हें सिद्ध करून दाखोवचें आनी हे विशींची श्वेत पत्रिका उजवाडाक हाडची. जीं कामां पुराय जाल्यांत तांचे फोटो घालतात. मात प्रत्यक्षांत थंयसर अर्धवट कामां केल्यांत, असो आरोप पणजी गट कॉग्रेसीन केला.
३१ मार्च डेडलायन दिवन लेगीत स्मार्ट सिटीचो आरोप करीत पणजी गट कॉंग्रेस मंडळाच्या कार्यकर्त्यांनी पणजे स्मार्ट सिटीचे कचेरे भायर निशेध करीत स्मार्ट सिटीचे वेवस्थापकी संचालक संजीत राॅड्रीग्स हांकां निवेदन भेटयलें.
निवेदन भेटयले उपरांत पणजी कॉंग्रेस गट अध्यक्ष प्रतिभा बोरकार हांणी सांगलें, तांणी स्मार्ट सिटीच्या कामा विशीं श्वेत पत्रिका जारी करपाची मागणी निवेदनांत केल्या. श्वेत पत्रिकेंत पुराय जाल्ले आनी उरिल्ल्या कामांचे तपशील आनी खर्च दिवचे सांगून, बाबत कामा खातीर कंत्राटदारांचेर केल्ली कारवाय आनी तांका काळे वळेरेंत उडोवप आनी हीं कामा केन्ना पुराय जातलीं हाचे गेरंटी सयत तारीख दिवची. ना जाल्यार लोक आनी न्यायालय तांकां जापसालदार धरतले, अशें बोरकार हिणें सांगलें.
पावस लागीं पावलो आनी परत परत जावपी कळाव आनी गडबडीच्या नियोजनांक लागून लोक निश्चीतूच त्रासांत पडटले. सरकार आनी स्मार्ट सिटीचीं कृत्यां पळयल्यार तांकां फक्त स्मार्ट सिटी उदरगतीच्या नांवा खाला लोकांचो पयसो हडप करपाचो आसा. तांकां सामान्य मनशाचें कांयच पडून गेल्लें ना, असो आरोप बोरकार हांणी करून जर उरिल्लीं कामां पावसा पयलीं पुराय करूंकना जाल्यार संबंधितां आड बेजापासलदारपणां आनी लोकांच्या पयशांचें गुड्डूलासांव केल्ल्याचो ठपको दवरून गुन्यांवकारी खटलो चलोवपाची शिटकावणी दिली.
ते भायर सगळ्या स्मार्ट सिटी प्रकल्पांची स्वतंत्र चाचपणी करून स्मार्ट सिटीच्या नांवा खाला चलील्लीं फटींगपणां आनी भ्रश्टाचार लोकां मुखार उक्ताडार हाडपाचें पणजी कॉंग्रेस गट समितीन थारयलां. हे विशीं बेगीनच्या बेगीन पार्दशक कारवाय करची ना जाल्यार आमी लोकांक घेवन रस्त्यार देंवतले आनी प्रकरण न्यायालयांत व्हरतले, अशीय शिटकावणी बोरकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
