भांगरभूंय | प्रतिनिधी
बड्ड्यां जाल्ल्या चर्चासत्रांत विचारविनिमय
मडगांव: बशींत सोरो पियेल्ले ड्रायव्हर आनी कंडक्टर, विद्यार्थिंनी कडेन असभ्य वागणूक, 50 टक्के बस सवलत न्हयकारप आनी बशींनी जावपी गर्दी हाचेर पुलिसांनी खर कारवाय करपाची गरज आसा. पणजे शाराचे धर्तेर मडगांव पालिकेच्या पालवान शारांत बस सेवा सुरू करपाचो विचार बड्डें सरकारी म्हाविद्यालयांतल्या चर्चे वेळार मांडलो.
रस्तो सुरक्षा सप्ता निमतान बड्ड्यां सरकारी म्हाविद्यालयाच्या सभाघरांत चर्चासत्राचें आयोजन केल्लें. हातूंत गोवा कॅनाचे पदाधिकारी हांचे सयत गिरायक वेल्फेर सेलाचो सहभाग आशिल्लो. मडगांव आनी साश्ट म्हालांतले रस्तो सुरक्षा आनी येरादारी वेवस्थापनाचेर राबयतल्या विवीध कार्यावळी समजून घेवपा खातीर आनी कागाळींचेर उपाय सोदपा खातीर ह्या कार्यावळीचें आयोजन केल्लें.
ह्या वेळार अतिरिक्त वाहन संचालक संदीप देसाय, मडगांवचे उपअधिक्षक राजेंद्र प्रभुदेसाय, भलायकी अधिकारी डॉ. सोकारो क्वाद्रोस, पालिका अभियंतो दीपक देसाय, मडगाव कदंब डेपो वेवस्थापक संकेत मांद्रेंकार, येरादारी पुलीस उपनिरिक्षक दिवाकर वेळीप, गोंय वुमन फोरम संयोजक लोर्ना फर्नांडीस, मंजुषा तळवडकार, मार्टीन रॉड्रिग्स आनी क्लायव्ह ग्रासीयस हाजीर आशिल्ले.
कार्यालयीन प्राचार्य डॉ. एफ. एम. नदाफ, डॉ. मारिया फातिमा डिसोझा आनी गोवा कॅनाचे समन्वयक रोलॅण्ड मार्टिन्स हांचो वांटो आशिल्लो.
ह्या चर्चासत्रांत भौशीक येरादारी आनी येरादारी वेवस्थापने विशीं विद्यार्थ्यां मदीं तांच्यो कागाळी मांडपा खातीर जागरुकताय निर्माण करप, रस्तो सुरक्षा गस्ती खातीर ट्रॅफीक वॉर्डन म्हूण नांवनोंदणी करून रस्तो सुरक्षे विशीं समवयस्क गट जागरुकताय निर्माण करप, नियमीत संवाद आयोजीत करप. अशा विवीध विशयांचेर ह्या वेळार चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
