पणजी शारांतल्या ई- बशींची तिकेट वाडली
भांगरभूंय | प्रतिनिधी
बसस्टॅण्ड ते बालभवन तिकेट २० रुपया, कदंब स्टॅण्डाक गरजे भायर प्रदशिणा
पणजी : स्मार्ट सिटींत धांवपी ई – बशींची तिकेट बिरेस्तारच्यान वाडयल्या. कांय स्टाॅप रद्द केल्यात, तशेंच तिकेटीचें अंतर भरचें म्हूण ‘रूट चेंजा’च्या नांवा खाला सकाळच्या वेळार कदंब बसस्टॅण्डाक एक उरफाटी प्रदक्षिणा घालप सुरू केलां. खास करून सकाळच्या वेळार पणजी बसस्टॅण्डा वयल्यान सुटपी बसी हो नवो नेम पाळटात. कंडक्टर, ड्रायव्हरा कडेन चवकशी केल्यार ते ‘तुमी कदंब डेपोन वचून विचारात’, अशें सांगतात. मजगतीं, कदंब म्हामंडळाचे डेपोचे लॅण्ड लायन नंबर ‘बंद केल्यात, इबाडल्यात’ असो संदेश आयकूंक येता.
पणजे बसस्टॅण्डा वयल्यान खंयूय गेल्यार १० रुपया तिकेट घेताले. मात आतां कांय बसींनी, देखीक, बी १ मार्गा वयल्यो बसी बसस्टॅण्ड ते सांतिनेज फायर ब्रिगेड मेरेनच्या प्रवासाक २० रुपया तिकेट घेवपाक सुरवात केल्या. कार्डाचेर १८ रुपया काडटात. तशेंच ह्यो बसी बसस्टॅण्डा वयल्यान सुट्टकच पाटो पुला कडल्यान भितर पर्यटन भवन, सेंट्रल लायब्ररी, आयकर भवन, मांडवी पूल मार्गान परत मारुतीच्या देवळा कडेन येतात आनी पार्किंग इमारती कडल्यान मागीर सदचो मार्ग धरतात. ‘आमकां अशेंच वचपाक डेपो अधिकाऱ्यांनी सांगलां. किलोमिटर भरपाक जाय. तुमी डेपोंत वचून विचारात’ अशी जाप एका कंडक्टरान दिली.
बसस्टॅण्डाक प्रदक्षिणा
विशेश म्हणल्यार बसस्टॅण्डा वयल्यान सुट्टकच बस बसस्टॅण्डाक प्रदक्षिणा काडटा तेन्ना एक पसून प्रवासी त्या मार्गाचेर देंवना. ह्या प्रवासाक उणीच सात ते १० मिनटां लागतात. ट्रॅफिक जॅम जाल्यार २० मिनटां. ‘हो नवो रुट कोणे सुरू केला तें कळना. बसस्टॅण्डा वयल्यान श्रमशक्ती वा आयकर भवनांत वचपाक चलत पांच मिनटां पुरो. १० रुपया दिवन तो प्रवासी बसींत कित्याक वतलो. सध्या खाजगी बसी १५ रुपया तिकेट घेतात, मात आतां ई- बशींनी २० रुपया घेवपाक सुरवात केल्या. हाचो फटको कदंब महामंडळाक बसतलो’, अशें एका प्रवासी बायलेन सांगलें.
ई- बशींच्या तिकेटी वाडीच्या संबंदी विचारपाक फोन केले तेन्ना कांय लॅण्ड लायन नादुरुस्त आशिल्ल्याचें संदेश येताले. तर कांय अधिकाऱ्यांनी फोन उखलूंक ना. चवकशी विभागांत विचारल्यार ‘आमकां खबर ना, तुमी डेपोंत विचारात’, अशें तांणी सांगलें.
मजगतीं, सकाळच्या वेळार बरेच प्रवासी कंडक्टरां कडेन वाद घालतना दिसले. तुमी तुमच्या अधिकाऱ्यांक विचारीनात, अशें विचारलें तेन्ना एका कंडक्टरान सांगलें, ‘सायब म्हणटा, एकलोय पॅसेंजर आमचे कडेन येवन कागाळ करीनात, तुमकां कित्याक पडलां?’
गुपचूप तिकेट दरवाड
स्मार्ट सीटींत धांवपी ई – बशींची तिकेट वाडयल्या जाल्यार पत्रकार परिशद घेवन तशी घोशणा करपाक जाय आशिल्ली. किलोमिटरां प्रमाण तिकेट घेवपाक जाय म्हूण ज्या मार्गाचेर एकूय पॅसेंजर चडना वा देंवना त्या मार्गा वयल्यान वेळ पिड्ड्यार करून बशीक भोंवताडो वा प्रदक्षिणा घालपाक लावपाची तकली खंयच्या अधिकाऱ्याची ते कदंब महामंडळान जाहीर करचें, अशी मागणी तिडकल्ल्या प्रवाशांनी केल्या. मजगतीं, मुख्यमंत्री डाॅ. प्रमोद सावंत, पणजी म्हापालिकेनूय हातूंत लक्ष घालचें, अशी प्रवाशांनी मागणी केल्या. जर कदंबाक हो ई- बशीचो वेवसाय परवडना जाल्यार तिकेट वाडोवपाची अधिकृत घोशणा करची, अशें एका तरणाट्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
