भांगरभूंय | प्रतिनिधी
पणजी: अर्थीक वर्स 2025-26 खातीर पणजी म्हानगरपालिकेन 120 कोटींचें अदमासपत्रक सादर केलें. अंदूं पणजेंतल्या विवीध विकासकामां खातीर 15 ते 20 कोटी रुपया खर्च करतले अशी म्हायती म्हापौर रोहीत मोंसेरात हांणी दिली. बिरेस्तारा म्हापालिकेच्या अर्थसंकल्पी बसके उपरांत तांणी पत्रकारां कडेन उलयतना ही म्हायती दिली. ताचे पयलीं नगरसेवक सुरेंद्र फुर्तादो हांणी अंदूंचो अर्थसंकल्प म्हणल्यार फक्त कॉपी कट पेस्ट आशिल्ल्याचो आरोप केलो.
म्हापौर मोंसेरात हांणी सांगलें, बचत, महसुला विशीं म्हानगरपालिकेची अर्थीक स्थिती बरी आसा. फाटल्या वर्साचे तुळेन अंदूंचो अर्थसंकल्प 30 कोटी रुपयांनी चड आसा. अंदूं म्हापालिकेक सुमार 120 कोटींचो महसूल जाल्यार 118 कोटी रुपया खर्च अपेक्षीत आसा. आमी करंझाळेचो नुस्त्यार बाजार आनी बाल उद्यान, सांतीनेजची दफनभूंय आनी हेर सुवातांनी विकासकामां करपाचो निर्णय घेतला. तशेंच हेर कडेन गरजेची दुरुस्ती करतले.
तांणी म्हणलें, हाचे बगर म्हापालिका नॅशनल थेटर तशेंच पणजी बाजारांतें लिव्ह अॅण्ड लायसन्स एग्रीमेंट अशा प्रलंबीत प्रस्नां विशींय काम करीत आसा. पणजी म्हानगरपालिकेच्या नव्या इमारतीचें बांदकाम करचें पयलीं पोरण्या इमारतींतल्यो कचेऱ्यो हेर कडेन हालोवप गरजेचें आसा. हे खातीर रोखडीच तात्पुरती सुवात सोदप गरजेची आसा. हे खातीर आमी लोकांक सोयीची थारतली अशी सुवात सोदतात. पूण सद्या चडशा सरकारी इमारतींनी सुवात ना, हाका लागून हें काम थोडें आडावन उरलां.
ताचे पयलीं म्हापालिका आयुक्त क्लेन मदेरा हांणी सांगलें, अंदूं म्हापालिकेक पणजी बाजारांतले लिव्ह अॅण्ड लायसन्स कबलातीचो प्रस्न गुंतागुंतीचो आसा. अशें आसलें तरी आमी तातूंतल्यान मार्ग काडटात. गाळे धारकांक तांची मूळ कागदपत्रां सादर करपाक सांगलां. हो प्रस्न रोखडोच सोडयतले. लिव्ह अॅण्ड लायसन्सा वरवीं अंदूं म्हापालिकेक 30 कोटी रुपयांचो महसूल अपेक्षीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
