भांगरभूंय | प्रतिनिधी
पणजी: बुधवारा पणजी म्हापालिकेची बसका पांचूच मिणटांत गुठयली. ह्या वेळार लोकोत्सव पणजी शारा भायर व्हरप, शारांतल्या पांयांचें पुनरुज्जिवी करप ह्या विशयांचेर थोडे भितर चर्चा जाली. बसकेंत शारांतलीं विवीध किरकोळ कामां, दीसवड्या वेल्या कामगारांक मुजतवाड, फुटपाथ दुरुस्ती, करंजाळे उद्यानाची दुरुस्ती ह्या कामांक मंजुरी दिली.
बसकेंत नगरसेवक कबीर पिंटो हांणी लोकोत्सवा सारके व्हड महोत्सव शारा भायर व्हरपाची मागणी केली. तांणी म्हणलें, लोकोत्सव हो लोकप्रीय आनी बरो महोत्सव आसा. हांगा सुमार 800 स्टॉल आसतात. लोकोत्सवाक दिसपट्टे हजारांनी लोक भेटी दितात. पूण पार्कींग आनी येरादारी वेवस्थेचें योग्य नियोजन नाशिल्ल्यान येरादारीची कोंयडी जाता. मिरामार ते पणजी बाजार ह्या वाठारांत वाहनां रस्त्यार आडकून उरतात.
महोत्सवाचे धा दीस हांगा येरादारीची कोंयडी जाता. फाटलीं खूबशीं वर्सां हो प्रस्न असोच आसा. फाटल्या वर्सा ह्या येरादारीचे कोंयडेक लागून एम्बुलन्स तीन फावटी आडकून पडपाची घडणूक घडिल्ली. हो महोत्सव डॉ. श्यामा प्रसाद मुखर्जी स्टेडियमार वा मेरशे व्हरचो. थंय ट्राफीक वा हेर समस्या निर्माण जावच्यो नात. तशेंच कला अकादमी वा बांदोडकार मैदानार जावपी संगिताचे वा हेर खंयचेय व्हड महोत्सव शारा भायर हालोवचे.
वसंत आगशीकार हांणी मागणी केली की, सांत ईनेज तशेंच पणजेच्या हेर वाठारांतले बांयांचें पुनरुज्जिवन करप गरजेचें आसा. कांय वर्सां पयलीं पणजेंत उदकाचो उणाव जाले उपरांत ह्या बांयांचें उदक वापरिल्लें. पूण आतां भुंयगत घाण उदकाक लागून ह्या बांयांचें उदक प्रदुशीत जालां. ह्यो सगल्यो बांयों नितळ करून तांचें पुनरुज्जिवन केल्यार फुडारांत ताचो फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
