भांगरभूंय | प्रतिनिधी
वेंचणूक 14 मार्चाक, मतमेजणी 16 मार्चाक
पणजी: पणजी म्हापालिका वेंचणूक 14 मार्चाक जावन मतमेजणी 16 मार्चाक घेवपाचो निर्णय जाला. वेंचणुकेची सविस्तर कार्यावळ 16 फेब्रुवारीक जाहीर जावन त्याच दिसा आचारसंहिता लागू जातली.
म्हापालिकेचे प्रभाग निश्चीत जाले उपरांत आरक्षणाची अधिसुचोवणी जारी जाल्या. आरक्षणाची अधिसुचोवणी जाहीर जाल्ल्यान इत्सुकां कडल्यान मोर्चेबांदणीक सुरवात जाल्या. म्हापौर रोहीत मोंसेरात, उदय मडकयकार, संतोष सुर्लीकार, निलेश मोरजकार हांचे प्रभाग आरक्षीत जाल्ल्यान तांकां दुसऱ्या प्रभागांतल्यान वेंचणूक लडोवची पडटली. म्हापालिका वेंचणुकेंत बाबूश मोंसेरात पॅनल आनी उत्पल पर्रीकार हांच्या पॅनला मदीं झूज जावपाचें निश्चीत आसा. ते भायर खूबशे अपक्ष लेगीत रिंगणांत देंवतले.
पणजी म्हापालिके विशी भारतीय जनता पक्ष कसलोय निर्णय बाबूश मोंसेरात हांकां विचारले बगर घेना. म्हापालिका वेंचणुकेंत लेगीत थळावो आमदार बाबूश मोंसेरात ज्या उमेदवारांची पॅनला खातीर निवड करतलो, ताका पक्ष तेंको दितलो.
पणजी म्हापालिकेचेर पयलीं सावन बाबूश मोंसेरात हांचेंच वर्चस्व आसा. आरक्षण जाहीर जातकच तांणी सगल्या 30 प्रभागांनी उमेदवार वेंचून येतले असो विस्वास उक्तायला. पयलींचे भाजप तशेंच हेर पक्षाच्या तेंक्यान उत्पल पर्रीकार हे वेंचणुकेत पॅनल उबे करतले. उमेदवारांची निवड करपा खातीर पारखणी सुरू केल्या. तारखो जाहीर जातकच पॅनलाचे उमेदवार जाहीर जातले अशें उत्पल पर्रीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
