भांगरभूंय | प्रतिनिधी
आयच्यान आचारसंहिता लागू, 11 मार्चाक मतदान, 13 मार्चाक मतमेजणी
पणजीः राज्य वेंचणूक आयोगान पणजी म्हापालिकेच्या वेंचणूकेची अधिकृत घोशणा केल्या. हे घोशणे प्रमाण 11 मार्च 2026 दिसा महानगरपालिकेच्या 30 प्रभागां खातीर मतदान जातले. जाल्यार 13 मार्चाक मत मेजणी जावन निकाल जाहीर जातलो. राज्य वेंचणूक आयुक्त मेनिनो डीसोझा हांणी आयज जाल्ले पत्रकार परिशदेंत सविस्तर म्हायती दिली. ह्या वेळार आयोगाचे सचीव वेनान्सियो फुर्तादो आनी सहाय्यक संचालक सागर गुरव हाजीर आशिल्ले.
पणजी म्हापालिकेचो पांच वर्सांचो कार्यकाळ 29 मार्च 2026 दिसा सोंपता. नेमा प्रमाण कार्यकाळ सोंपचे पयलीं नवीन महापालिका अस्तित्वांत येवंक जाय हाका लागून आयोगान ही वेंचणूक प्रक्रिया जाहीर केल्या. महानगरपालिकेच्या वट्ट 30 प्रभागांनी जावपी हे वेंचणुकेंत 32,496 मतदार मतदान करतले. हातूंत 15,225 दादले आनी 17,271 बायलो मतदारांचो आस्पाव आसा. हे वेंचणुके खातीर बॅलेट पेपरचो वापर करतले अशें आयुक्तान स्पश्ट केलां.
वेंचणुकेच्या वेळापत्रका प्रमाण, उमेदवारी अर्ज स्विकारपाची प्रक्रिया फाल्यां, 17 फेब्रुवारी सावन सुरू जातली. इत्सूक उमेदवारांक 24 फेब्रुवारी मेरेन सकाळीं 10 ते दनपारां 1 वरां मजगतीं अर्ज सादर करपाक मेळटले. अर्जांची छाननी 25 फेब्रुवारीक जातली. जाल्यार उमेदवारी अर्ज फाटीं घेवपाची मुजत 26 फेब्रुवारीक दनपारां 3 मेरेन दिल्या. 11 मार्चाक सकाळीं 8 ते सांजे 5 मेरेन मतदान जातलें आनी मतांची मेजणी 13 मार्चाक बांबोळेच्या डॉ. श्यामा प्रसाद मुखर्जी स्टेडियमांत जातली. वेंचणूक जाहीर जाले उपरांत पणजी महानगरपालिका वाठारांत आचारसंहिता लागू जाल्या.
वेंचणूक आयोगान अंदूं उमेदवारांच्या खर्चाचेर मर्यादा घाल्या. दरेका उमेदवाराक चडांत चड 2.50 लाख रुपया मेरेन खर्च करपाक मेळटा. उमेदवारी अर्जा खातीर उक्त्या वर्गांतल्या उमेदवारांक 2 हजार रुपया जाल्यार राखीव वर्गांतल्या उमेदवारांक 1000 रुपया अनामत रक्कम जमा करची पडटली. तशेंच प्रभागांच्या आरक्षणा विशीं म्हायती दितना आयोगान सांगलें, वट्ट 10 प्रभाग बायलां खातीर, 8 प्रभाग हेर मागास वर्गा खातीर (ओबीसी) आनी 1 प्रभाग अनुसुचीत जमाती खातीर (एसटी) राखून दवरल्यात. वेंचणुके खातीर पुलीस तैनात करतले तशेंच देखरेख करपा खातीर फ्लायिंग स्क्वाड आनी निरिक्षक नेमल्यात.
महानगरपालिके वांगडाच राज्यांतल्या वेगवेगळ्या तालुक्यांनी रितें आशिल्ल्या 14 पंचायत प्रभागांच्या पोटवेंचणुकेचें वेळापत्रकय जाहीर केलां. ह्या 14 प्रभागां खातीर 8 मार्च 2026 दिसा मतदान जातले आनी मतांची मेजणी 9 मार्चाक जातली. ह्या पोटवेंचणुके खातीर उमेदवारी अर्ज 18 फेब्रुवारी सावन स्विकारतले. हातूंत पेडणें, दिवचल, बार्देस, साश्ट, फोंडें, केपें आनी काणकोण ह्या तालुक्यांतल्या वट्ट 14 प्रभागांचो आस्पाव आसा. ह्या वाठारांनीय आयच्यान आचारसंहिता लागू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
