भांगरभूंय | प्रतिनिधी
पणजी: उत्तर गोंय जिल्होधिकार्यान पणजी म्हापालिका वाठारांत दोनचाकी आनी चारचाकी वाहनां खातीर पे पार्कींग वाठार अधिसुचीत केल्यात. मिरामार सर्कल हांगा सुलभ शौचालया लागसार (मिरामार बीच), मारूती देवळा लागसार, फार्मासी कॉलेजी लागसारा, सांतिनेज चर्च ते थॉमस गॅरेजी लागसार सांकवा मेरेन (महात्मा गांधी मार्ग आनी वासुदेव धेंपो मार्ग), सांतिनेज सिमेंतरी ते मधुबन इमारती लागसारच्या हायमास्ट मेरेन, डॉ. दादा वैद्य मार्ग, डॉ. ब्रागांझा पेरेरा मार्ग (नगरपालिका क्वॉटर्स ते कला अकादमी/ डी. बी. मार्ग) आनी गामा पिंटो मार्ग (नगरपालिका क्वॉटर्स ते हॉटेल पालासियो) हांगा पे पार्कींग जागे अधिसुचीत केल्यात.
पार्किंग फी घेवपी मनशांनी पणजी म्हापालिकेन सुचयिल्लो युनिफॉर्म घालप, वळखपत्र लागीं बाळगूवप आनी पार्कींग फी दरपत्रक बाळगूपाक जाय. पार्कींग फी पावतीचेर पणजी म्हापालिकेचें नांव आसपाक जाय. चारचाकी वाहनां खातीरच्या पार्कींग जाग्यार दोन एर्मजन्सी वाहनां खातीर जागे दवरपाक जाय. दिव्यांग व्यक्तींच्या वाहनां खातीर जागे राखीव दवरपाक जाय. तशेंच म्हापालिकेन घालून दिल्ल्या हेर सगळ्या नेमांक पाळो दिवपाची गरज आसा.
नो पार्कींग वाठार अधिसुचीत
उत्तर गोंय जिल्हो न्यायदंडाधिकार्यान बार्देस म्हालांतल्या शिवोले- मार्ना पंचायत वाठारांत अनिल थळी हांचें घर ते आजोबा देवळा लागसारच्या रस्त्याच्या दोनूय वटेन, होली क्रॉस चॅपल ते ग्लेना मदेराच्या घरा मेरेन, सावियो मदेराच्या घरा सावन १५० मिटर मेरेन जोड रस्त्याच्या दोनूय वटेन आनी तीनमाड रेस्टाॅरंट ते रामदास स्वामी मठा मेरेन रस्त्याच्या दोनूय वटेन सगळ्या तरेच्या वाहनां खातीर नो पार्कींग विभाग अधिसुचीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
