भांगरभूंय | प्रतिनिधी
पणजीः पणजी म्हानगरपालिके वतीन ‘इट रायट वॉकथॉन’ आयोजीत केल्या. स्मार्ट सिटी कार्यालय तशेंच अन्न आनी वखदां प्रशासनाच्या जोडपालवान हें आयोजन केलां. शेनवारा सकाळीं 7 वरांचेर मिरामार सर्कला लागसार वॉकथॉनाची सुरवात जातली, अशी म्हायती म्हापालिका आयुक्त आग्नेलो फर्नांडीस हांणी पत्रकार परिशदेंत दिली.
मिरामारच्यान कला अकादमी आनी थंयच्यान परतून मिरामार अशें अंतर वॉकथॉना खातीर थारायलां. हें अंतर पुराय जाले उपरांत मिरामार येवन घनकोयर वेवस्थापन विभागा वतीन रस्तोनाट्याचें सादरीकरण जातलें. तशेंच कांय योग प्रात्यक्षिकांय दाखयतले. नेमान व्यायाम आनी योग्य आहार हांच्या माध्यमांतल्यान निरोगी जीवनशैली आपणावपाक मेळटा. हे खातीर ह्यो कार्यावळी जातल्यो, अशें फर्नांडीस हांणी सांगलें.
कार्यावळी खातीर पाश्वगायिका हेमा सरदेसाय, पद्मश्री ब्रह्मानंद शंखवाळकार आनी हेर सरकारी अधिकाऱ्यांचे हाजिरेंत वॉकथॉनाची सुरवात जातली. सध्या 100 परस अदीक जाणांनी नोंदणी केल्या. गोंयभरांतल्यान 700 ते 800 जाण वांटो घेतले, अशी म्हायती ह्या वेळार दिली. पत्रकार परिशदेक स्मार्ट सिटी कार्यालयाची निकिता गडकार तशेंच अन्न आनी वखदां प्रशासन विभागाचे रिचर्ड नोरोन्हा हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
