भांगरभूंय | प्रतिनिधी
पणजी : पणजी म्हानगरपालिकेच्या प्रभाग फेररचने विशीं दाखल केल्ली याचिका उच्च न्यायालयान भायर मारली. हे विशींचो आदेश न्या. भारती डांगरे आनी निवेदिता मेहता ह्या दोन वांगड्यांच्या न्यायपीठान दिलो.
ह्या प्रकरणांत मिनिनो डिक्रुझ हांणी याचिका दाखल केल्ली. तातूंत तांणी राज्य सरकार, राज्य वेंचणूक आयोग, नगरपालिका प्रशासन आनी पणजी महानगरपालिका हांकां प्रतिवादी केल्लें. हे विशीं न्यायालयांत सुनावणी जली. पणजी म्हानगरपालिका प्रभाग फेररचनेची प्रक्रिया राज्य सरकारान नगरपालिका प्रशासना कडेन दिल्या. याचिकादारान ताका विरोध करून प्रभाग फेररचनेत व्हडा प्रमाणांत हस्तक्षेप जातलो असो दावो केलो. तशेंच फेररचनेची प्रक्रिया राज्य वेंचणूक आयोगा कडेन वर्ग करची अशी मागणी केली.
प्रक्रिया राज्य निवडणूक आयोगा वतीन जावची असो कसलोच कायदो ना. हाका लागून ही प्रक्रिया नगरपालिका प्रशासन वा हेर खंयच्याय प्राधिकरणाकडेन वर्ग करूं येता. अशीच याचिका पंचायत प्रभाग फेररचने विशीं उच्च न्यायालयांत याचिका दाखल केल्ली. ताचेर उच्च न्यायालयान निवाडो दिवन याचिका भायर मारपाचो संदर्भ सरकारान दिलो. ह्या प्रकरणांत दोनूय वटेनचें आयकून घेतले उपरांत न्यायालयान पणजी महानगरपालिकेच्या प्रभाग फेररचने विशीं याचिका भायर मारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
