भांगरभूंय | प्रतिनिधी
पणजी : पणजी म्हापालिकेचे वेंचणुके खातीर दनपरां ४ वरां मेरेन मतदानाक बरो प्रतिसाद मेळ्ळो. दनपरां ४ वरां मेरेन ६२.२४ टक्के मतदान जालें. अंदूं फाटल्या वेंचणुकेच्या तुळेंत मतदानाची टक्केवारी वाडपाची शक्यताय आसा. सांजवेळा ५ वरां मेरेन मतदान करपाक मेळटा. म्हापालिकेच्या ३० वाड्यां खातीर ६९ उमेदवार लढटले. हातूंतल्या तेवीस वॉर्डांनी सरळ दोन सर्ती जातल्यो, जाल्यार स वॉर्डांनी तिगांची.जाल्यार २६ व्या वॉर्डांत सगल्यांत चड ५ उमेदवार लढटले.
मतमेजणी १३ मार्चाक सकाळीं ८ वरां पसून श्यामा प्रसाद मुखर्जी स्टेडियमांत सुरू जातली. उपरांत रोखडेच निकाल जाहीर करतले. वेंचणूक मुखेलपणान भाजप समर्थीत मंत्री बाबुश मोन्सेरात हांचें पॅनल आनी उत्पल पर्रीकार हांच्या आमी पणजेकार ह्या पॅनला मदीं जाता. दोनूय पॅनलां वतीन जिखपाचो दावो करतात. निमाण्या सत्रांत मतदानाची टक्केवारी वाडपाची शक्यताय आसा.
मजगतीं प्रभाग नंबर ४ तल्यान लढपी महापौर रोहित मोन्सेरात हांणी विरोधक कितें सांगतात हाचे परस फाटलीं पांच वर्सांनी जाल्ली उदरगत पळोवन मतदान करपाचो उलो मारलो. तांणी म्हणलें, आमी पणजेची हुंवाराची स्थिती नियंत्रणांत हाडली. फुडल्या पांच वर्सांनी आमकां आनीक उदरगतीचीं कामां करपाचीं आसात. मतदारांनी ह्या वेळारूय आमकां तेंको दिवचो. उत्पल पर्रीकार हांणीी लोकांनी भायर सरून मतदान करपाचो उलो मारलो.
उत्पल हांचे कडेन बापाय भशीन गूण नात
रोहित मोन्सेरात हांणी सांगलें, मनोहर पर्रीकार हांचे कडेन बरे नेतृत्व गुण आशिल्ले. मात तांचो पूत उत्पल हांचे कडेन बापाय सारको एक पसून गूण ना. जेन्ना पणजे समस्या निर्माण जाल्यो तेन्ना उत्पल गायब आशिल्ले.
मतदानाची टक्केवारी वाडप ही बरी गजाल: बाबुश
पणजी महापालिकेचे वेंचणुकेंत आतां मेरेन मतदानाची टक्केवारी बरी आसा. मतदानाची टक्केवारी ७० ते ८० मेरेन पावपाक शकता. लोकशाये खातीर ही बरी गजाल आसा. मतदारांनी कोणाम मत दिलें हें १३ तारखेक समजतलें, अशें बाबुश मोन्सेरात हांणी म्हणलें.
फाटल्या पांच वर्सांनी पणजेकारांच्यो समस्या वाडल्यात. आतां तांकां बदल जाय. म्हणूनच लोक घरा भायर पडून मतदान करतात. प्रभाग फेररचणूक, आरक्षण करतना घोळ केला. हातुंतल्यानच सत्ताधारी भियेल्ल्याचें दिसून येता, अशें वाल्मिकी नायक (प्रदेशाध्यक्ष, आप) हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
