भांगरभूंय | प्रतिनिधी
सतरा प्रभागांनी द्विपक्षीय लढत जावपाची शक्यताय
पणजी : पणजी महापालिका वेंचणुके खातीर उमेदवारी अर्ज भरपाक आयज निमाणो दीस आशिल्लो. आतां मेरेन ३० प्रभागां खातीर ७८ उमेदवारांनी अर्ज दाखल केल्यात. सतरा प्रभागांत दोन पक्षां मदीं, णव प्रभागांत तीन, तीन प्रभागांत चार जाणां मदीं लढाय जावपाची शक्यताय आसा. प्रभाग नंबर २६त सगल्यांत चड ५ उमेदवार इत्सूक आसात. अर्जांची छाननी फाल्यां (बुधवार २५ फेब्रुवारी) जातली. अर्ज फाटीं घेवपाची निमाणी मुजत २६ फेब्रुवारीक दनपरां ३ वरां मेरेन आसा.
वेंचणुकेंत भाजपाक समर्थन करपी मंत्री बाबुश मोन्सेरात हांचें पॅनल आनी उत्पल पर्रीकार हांच्या आमी पणजेकार हांच्या पॅनला मदीं सरळ लढाय जातली. ह्यान पयलीं बाबूश हांच्या पॅनलान तिसूय प्रभागांत उमेदवार दिल्यात. आयज दत्तप्रसाद नायक हांणी आमी पणजेकारानूय ३० प्रभागांत उमेदवार दिल्ल्याचें सांगलें. उमेदवारांचीं नांवां बेगीनूच जाीर करतले अशें तांणी सांगलें. उमेदवारांच्या प्रस्तावाक रावचें न्हय म्हणून चेंपण आयिल्ल्याचो आरोप नायक हांणी केलो.
ह्यान पयलीं महापौर रोहित मोन्सेरात हांणी विरोधक निमाण्या दिसांनी सक्रीय जावन फकत टिकेचें राजकारण केल्ल्याचो आरोप केल्लो. बाबुश हांचें हें पॅनल उदरगतीच्या कामांच्या नेटार वेंचणूक लढयता अशें तांणी स्पश्ट केल्लें. उत्पल पर्रीकार हांणी कॅसिनोंक लागून पणजे जाल्ल्या समस्यांक प्राधान्य दितले अशें सांगिल्लें. पारदर्शक प्रशासन आनी भ्रश्टाचारमुक्त पणजी हें आमी पणजेकाराचें ध्येय आशिल्ल्याचें तांणी सांगलें.
महापालिका वेंचणुके खातीर मतदान ११ मार्चाक जातलें. जाल्यार १३ मार्चाक निकाल लागतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
