भांगरभूंय | प्रतिनिधी
पणजी : महापौर रोहित मॉन्सेरात, उदय मडकयकार, संजीव नायक हांचे प्रभाग आरक्षीत जाले उपरांत भाजप समर्थक पॅनलचे ५० टक्के उमेदवार नवे आसतले, अशें महसूल मंत्री तशेंच पणजेचे आमदार बाबूश मॉन्सेरात हांणी सांगलें. ह्या वेळार तरणाट्यांक संद दितले, अशेंय तांणी स्पश्ट केलें.
पणजी महापालिका वेंचणुकेची तारीख जाहीर जाली जावंक नासली तरी वेंचणूक मार्चांत जातली. प्रभाग रचणुके वांगडा आरक्षणाची अधिसुचवणी जारी जाल्ल्यान इत्सुकां कडल्यान तयारेक वेग आयलो. सुरेंद्र फुर्तादो, जॉएल आंद्राद, उदय मडकयकार हांचे सयत सध्याच्या नगरसेवकांचे प्रभाग आरक्षीत जाल्ल्यान ह्या वेळार चित्र बदलतलें.
हे फाटभूंयेर आपलें पॅनल सगले म्हणल्यार ३० प्रभाग जिखतले असो विस्वास महसूल मंत्री बाबूश मॉन्सेरात हांणी उक्तायलो. पक्षा कडेन चर्चा करून हांव पॅनल वेंचणुकेंत देंवयतले. ह्या वेळार ५० टक्के उमेदवार नवे तशेंच तरणाटे आसतले. पक्षाच्या फाटबळाक लागून निश्चीतूच एकान एक उमेदवार जैतिवंत जातले, अशें तांणी म्हणलें.
पणजी महापालिका वेंचणुकेंत पॅनल देंवोवपाचें उत्पल पर्रीकार हांणीय जाहीर केलां. हाचेर उलयतना बाबूश मॉन्सेरात हांणी सांगलें, लोकशायेंत वेंचणूक लढोवपाचो अधिकार सगल्यांक आसा. फाटले फावटींय जायते जाण विरोधांत आशिल्ले. ह्या वेळारूय आसले तरी कांयच फरक पडना. आमचे सगले उमेदवार भोवमतान वेंचून येतले, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
