भांगरभूंय | प्रतिनिधी
पणजी: पणजेंतल्या बेवारशी सुण्यांक खावपाक घालपा खातीर आनी तांचे भोंवतणी बरे वागणुकेक प्रोत्साहन दिवपा खातीर पणजी म्हानगरपालिका (मनपा) वाठार आंखतली. हाका लागून बेवारशी सुण्यांच्या हल्ल्याचें प्रमाण उणें जातलें आनी तांकां शांततायेंत दवरपाचो उद्देश आशिल्ल्याचें मनपान सांगलें.
पणजी अॅनिमल वेल्फेर सोसायटी वतीन पणजेंतल्या बेवारशी सुण्यां खातीर जेवण तयार करपाक कम्युनिटी कीट-चेन स्थापन करपाची शिफारस केल्या. तशेंच सामुदायीक आहारा खातीर बरे समन्वय, जेवणाच्यो सुवातो निश्चीत करप आनी निश्चीत आहार वेळार दिवपाची मनपाक शिफारस केल्ली.
तशेंच मनपान शारांतल्या शाळांनी भुरग्यांक शिक्षीत करपा खातीर आनी प्राण्यां विशीं मोग निर्माण करपा खातीर संवदेनशीलताय मोहीम घडोवन हाडपाचो प्रस्ताव मांडला.
तशेंच पालिकेच्या नगरसेवकांक प्राणी कल्याण कायद्या कडेन वळख करून दिवपा खातीर आनी मनीस-प्राणी संघर्श आडावपा खातीर जिल्हो सोसायटी फॉर प्रिव्हेन्शन ऑफ क्रुएल्टी टू अॅनिमल (डीएसपीसीए) बराबर सुरळीत समन्वय सुनिश्चीत करपा खातीर एक सत्र आयोजीत करपाचीय सुचोवणी केल्या.
तशेंच गोंय हें देशांतलें पयलें रेबीज नियंत्रीत राज्य आसा. रेबीज दुयेंसाक लागून मनशांक मरण येवपाचें प्रमाण शुन्य आसा आनी पांच वर्सां परस चड काळ मनीस-प्राणी संघार्शाचें प्रमाण उणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
