भांगरभूंय | प्रतिनिधी
चवकशे उपरांत वावडी आशिल्ल्याचें स्पश्ट
भांगरभूंय । प्रतिनिधी
पणजी : पणजे पाट्या वयल्या पासपोर्ट भवन इमारतींत बॉम्ब दवरिल्ल्याची धमकी दिवपी ईमेल मेळिल्ल्यान सोमारा सकाळीं वाठारांत खूब बोवाळ जालो. मात खोलायेन तपसाणे उपरांत हो कॉल एक वावडी आशिल्ल्याचें स्पश्ट जालें.
सोमारा सकाळीं 10.39 वरांच्या सुमाराक पासपोर्ट भवन इमारतींत बॉम्ब दवरिल्ल्याचो कॉल उजो पालोवपी दळाक मेळ्ळो. हे म्हायतीचें गांभीर्य वळखून अजो पालोवपी दळ आनी पुलिसांनी ताकतिकेन घडणुकेचे सुवातेर धांव मारली. खबरदारीचो उपाय म्हूण पुराय इमारत सोमतीच रिती केली आनी वाठाराची नाकाबंदी केली. बॉम्ब सोदून काडपी आनी तो निकामी करपी पंगडान इमारतीच्या खाची कोनशांनी आनी कुसीच्या जीएसआयडीसी इमारतीच्या वाठाराची बारीकसाणीन तपासणी केली.
खूब वेळ चलिल्ले हो सोद मोहिमे वेळार पुलिसांक कसलीच दुबावीत वस्तू मेळूंक ना. निमाणे कडेन ही धमकी फटीची आशिल्ल्याचें सिद्ध जाले उपरांत पुलिसांनी ही वावडी आशिल्ल्याचें जाहीर केलें आनी सगल्यांनी सुटकेचो उस्वास सोडलो. सोद मोहिमे उपरांत इमारतींतलो वेव्हार परतून सुरळीत सुरू केलो. मजगतीं, हो ईमेल कोणे धाडलो, हाचो सोद आतां पुलिसांनी सुरू केला. भौशीक शांतताय पेड्डेर करपी आनी भंयाचें वातावरण निर्माण करपी हे अज्ञात व्यक्तीक सोदपा खातीर पुलीस तंत्रीक तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
