भांगरभूंय | प्रतिनिधी
वास्को : बंदर कामगारांच्या अडेज म्हयन्यां आदीं केल्ली पगार कबलात रोखडीच चालीक लागची हे खातीर सडो, मुरगावचे बंदर प्राधिकरणाचे पेन्शनधारक संघटणेन कार्यालया मुखार मंगळारा दनपरां जेवणाचे सुटयेंत निदर्शनां केलीं. ह्या वेळार हजर आशिल्ल्या कामगारांक गोंय बंदर आनी गोदी कामगार संघटना तशेंच मुरगांव बंदर आनी रेल्वे कामगार संघटना हांणी फाटबळ दिलें.
मुखेल बंदरांतले स कामगार महासंघ आनी इंडियन पोर्ट असोसिएशनान फाटल्या २७ सष्टेंबराक पगार कबलातीचेर सयो केल्ल्यो. कबलात चालीक लागपाक कळाव जाता. हे विशीं विवीध कामगार महासंघांनी इंडियन पोर्ट असोसिएशनाक जापसालदार धरले. कबलातीचो लाव निवृत्ती कामगारांकूय जातलो. ताका लागून तांकांय बंदर कामगारांक फाटबळ दिवपा खातीर निदर्शनां केलीं.
ह्या वेळार गोवा बंदर कामगार संघटना, मुरगाव बंदर आनी रेल्वे कामगार संघटना हांचे पदाधिकारी हजर आशिल्ले. १५ डिसेंबर मेरेन पगार कबलात चालीक लागना जाल्यार १७ डिसेंबर सावन बेमुदत संपावर वचपाची शिटकावणी कामगारांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
