भांगरभूंय | प्रतिनिधी
गोविंद गावडे: सतारवादक पं. योगराज नायक हांच्या उगडासान ’स्वरयोगी’ कार्यावळ उमेदीन
पणजी: योगराज हो संगीतांतलो एक लिकलिकपी हिरो आशिल्लो. यादींच्या रुपान ते आमच्या काळजांत तशेच आसा, अशें कला संस्कृती मंत्री गोवींद गावडे हांणी सांगलें. कला संस्कृती संचालनालया वरवीं संगीत शिक्षक, प्रशिक्षक म्हणून काम करपी पगारापुरते सेवा दितात जाल्यार तांचे आड खर निर्णय घेवचो पडटलो अशी शिटकावणी तांणी केली.
पंडीत योगराज नायक प्रतिश्ठानान इन्स्टिट्यूट मिनेझीस ब्रागांझा (आयएमबी) च्या जोड पालवान आयएमबी च्या छोटेखानी सभाघरांत आयतारा सतारवादक पं. योगराज नायक हांच्या उगडासान आयोजीत केल्ले ’स्वरयोगी’ कार्यावळीक मुखेल सोयरे म्हणून उलयताले. सतारवादनाच्या प्रचारा खातीर योगराज प्रतिश्ठानाक आपलें खातें पुरायेन सहकार्य करतलें, अशें आस्वासन मंत्री गावडे हांणी दिलें. ह्या वेळार माचयेर मुखेल सोयरे ह्या नात्यान लोककलांचे अभ्यासक तशेंच कला अकादमीचे निवृत्त वांगडी सचीव डॉ. पांडुरंग फळदेसाय, मानाचे सोयरे म्हणून आयएमबीचे वांगडी सचीव गोरख मांद्रेंकार, प्रतिश्ठानाची अध्यक्ष प्रचला आमोणकार, उपाध्यक्ष प्रशांती तळपणकार हाजीर आशिल्ली.
गोरख मांद्रेंकार हांणी, योगराज हांचो हात धरपी सतारवादन मळार गोंयांत कोणूच नाशिल्लो. अशे तरेच्या उपक्रमांक आयएमबीचें सदांच सहकार्य आसतलें अशें तांणी सांगलें.
सतार साधना करपी कलाकारांक शिश्यवृत्ती
म्हजो भाव योगराज म्हजो गुरू आशिल्लो. ताका लागून हांवें कला अकादेमीची शिडी चडली. आकाशवाणीची सगळ्यांत उंचेली श्रेणी मेळयली. ताच्या दर एका नव्या संगीत प्रकल्पांत हांव गायतालें. तो शारिरीक रितीन आमचे वांगडा नासूं येता पूण ताचो आत्मो आमचे वांगडा चलता. सतारवादन गोंयांत जिवें रावचें देखून तो शिश्य घडयत रावलो. ताचें काम फुडें व्हरपा खातीर ह्या वर्सा सावन आमी सतार साधना करतल्या तरणाट्या कलाकारांक शिश्यवृत्ती दिवपाचें थारायलां. तशेंच सताराची कार्यशाळा घेवपाचीय येवजण आसा.
अस्वस्थ कलाकारांच्या हातांत कितेंय खाशेलें घडटा
योगराज हे एक प्रतिभावान आनी बुदवंत कलाकार आशिल्ले. ताचे सारकिल्ल्या अस्वस्थ कलाकारांच्या हातांतच कितें तरी खाशेलें घडूंक शकता. ते सतत कितें तरी नवें करचे पयलीं अस्वस्थ आसताले. दुसर्याच्या पेल्यांतल्यान उदक पियेवप ताच्या स्वभावांत नाशिल्लें. पोटांत एक आनी वोंठार एक अशें तांचें नाशिल्लें. ते एक स्वाभिमानी कलाकार. ताणीं आपल्या बापायचें आनी कुटुंबाचें कला दायज कुशळटायेन मुखार व्हेलें, अशें डॉ. पांडुरंग फळदेसाय हांणी म्हणलें.
– प्रचला आमोणकार
सतार साधना करपी प्रणव अवधूत च्यारी ह्या विद्यार्थ्याक गोविंद गावडे हांचे हस्तुकीं शिष्यवृत्ती भेटयली. रोख दहा हजार रुपया, यादस्तीक आनी प्रमाणपत्र अशें ताचें स्वरूप आशिल्लें. मानेस्तां हस्तुकीं दिवली पेटोवनकार्यावळ सुरू जाली. योगराज हांची आवय श्यामलता हांणीय दिवली पेटयली. शरण्या पिसुर्लेंकार हांणी स्तवन म्हणलें. साईश देशपांडे हांणी सुत्रसंचालन केलें. प्रशांती तळपणकार हांणी उपकार मानले.
योगराज हांचे पूत कार्तीक हाचें गिटारवादन जालें. तांकां सुरजीत थळी हांणी तबला साथ दिली. उपरांत प्रणव अवधूत च्यारी हांचें सतारवादन रंगलें. ताका कौस्तूभ च्यारी हांणी तबलें साथ दिली. शरण्या पिसुर्लेंकार हांणी शास्त्रीय गायनांत श्याम कल्याण राग गायलो. तिका पेटयेर विपूल भगत आनी तबल्यार सोहम रानडे हांणी साथ दिली. निमाणें योगराज हांचे शिश्य निखील जोशी हांचें बहारदार सतारवादन जालें. तांकां डॉ. उदय कुलकर्णी हांणी तबला साथ केली. योगराज हांची घरकान्न उषा, धूव डॉ. गौतमी, भयण पूनम बुधाळकार हांणी कलाकारांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
