भांगरभूंय | प्रतिनिधी
पणजीः पक्ष फुटीरांक परत पक्षांत घेवचे ना अशी ठाम भुमिका कॉंग्रेस पक्षाची आसा. जर दुसर्या खंयच्याय पक्षान तांकां घेतल्या आसत जाल्यार हो प्रस्न ते राजकी पक्षाक विचारचो तांचे वतीन हांव उलोवपाक शकना. झेडपी वेचणुकेची फुडली रणनीती थारोवपा खातीर आमी युती पक्षांचे अध्यक्षांची आयज बसका आपयल्या, अशें गोंय कॉंग्रेस प्रदेशाध्यक्ष अमित पाटकार हांणी सांगलें.
कॉंग्रेशीचे आदले काणकोणचे आमदार इजिदोर फर्नांडीस हे १० आमदारां वांगडा कॉंग्रेस पक्ष फोडून भाजपांत आस्पावल्ले. मात हालींच कॉंग्रेशीचो आघाडी पक्ष गोवा फॉरर्वडांत इजिदोर हांणी प्रवेश केल्ले कारणान राजकी मळार आरत्यो परत्यो चर्चा सुरू जाल्यात. हे विशीं पाटकार हांचे कडेन स्पश्टीकरण मागलें.
आमी पक्षबदलूंक घेवचे नात अशें कॉंग्रेस पक्षान ह्यान पयली सागून आपली भुमिका स्पश्ट केल्या, अशें पाटकार हांणी म्हणलें. जर दुसरो खंयचोय पक्ष जर तांकां घेता जाल्यार हे प्रस्न तांकां वचून विचारपाचे म्हाका न्हय. हांव दुसरे राजकी पक्षाचे वतीन जाप दिवपाक शकना. हांव गोंय कॉंग्रेसीचो प्रदेशाध्यक्ष म्हाका कॉंग्रेस पक्षा बद्दल विचारल्यार हांव जाप दितलों, अशें रजाव पाटकार हांणी दिलें.
सद्या तीन राजकी पक्ष मेळपाचे आसा. युती विशीं चर्चा करून आमी फुडलो निर्णय घेतले, अशें पाटकार हांणी म्हणलें.
हांवें हेर पक्षाच्या अध्यक्षाक बसके खातीर फोन केल्लो. मात ते हेर कामांक व्यस्त आशिल्ल्यान तशेंच सद्या लग्नाचे दीस आशिल्ल्यान दिसाक धा- धा लग्नां आसतात. देखून मेळपाचो वेळ जुळूंक ना. सद्या तीन राजकी पक्षांचे मुखेलींक मेळोवन हाडपाचो यत्न हांवें केला. एकलो चलो म्हण आपान आपली भुमिका स्पश्ट केल्या, अशीं म्हायती पाटकार हांणी दिली.
भाजपाचे उमेदवार जाहीर जातकर कॉंग्रेस करतली उमेदवारांची घोशणाः पाटकार
वेचणुकेचे तारीख अधिसुचीत जावनी आनी भाजपाक आपले उमेदवार पयलीं जाहीर करूनी उपरांत आमी रोखडेच उमेदवार जाहीर करतले.
पयलीं वेचणुकेची अधिसुचोवणी येवन तारीख जाहीर जावनी आमी उमेदवार जाहीर करपाक तयार आसात. आमी उमेदवार घोशीत करता काय म्हण भाजप रावला. मात म्हाका म्हजी स्ट्रेटजी भाजपा मुखार उक्ती करपाची ना. आमचे लक्ष भाजपाक हरोवपाचें आसा. जर हांवें उमेदवार पयलीं जाहीर केले ते आमचे उमेदवार आनी लोकांक लक्ष करपाक सुरवात करतले. आमकां भाजपाचे बळी पडपाक नाका. आमचे उमेदवार कार्य करता. इस्तुक उमेदवारांक आमी काम करपाक अनाधिकृतपणान सांगलां, अशें पाटकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
