भांगरभूंय | प्रतिनिधी
प्रुडंट मिडियाचे हेड ऑन कार्यावळींत गोविंद गावडे हांचें सांगणें
पणजी: कला अकादमीचो स्लॅब कोसळ्ळो तेन्ना म्हज्याच पक्षाच्या थिंक टँक म्हणपी कांय लोकांनी विरोधकांक मसालो (मटेरियल) पुरयलो. योग्य वेळार पुराव्या निशी ही गजाल हांव उक्तडार हाडटलों. पक्षांतल्या लोकांक म्हजे विशीं अॅलर्जी आसा. ती कित्याक आसा? हें म्हाकाखबर ना अशें आमदार गोविंद गावडे हांणी सांगलें.
प्रुडंट मिडियाच्या हेड ऑन कार्यावळींत गोविंद गावडे हांणी मुलाखत दिली. प्रुडंट मिडियाचे संपादक संचालक प्रमोद आचार्य हांणी ही मुलाखत घेतली. आदिवासी कल्याण खातें, कला अकादमी ह्या विशयाचेर तांणी भाश्य केलें.
दुरुस्ती उपरांत कला अकादमीत कांय दोश आसले तरी कांय बऱ्यो गजाली लेगीत जाल्याे. पयली उदक जे झिरपतालें तें आतां बंद जालां. जे किदें दोश आसात ते पयस करपाची जापसालदारी भौशीक बांदकाम खात्याची आसा. प्रधान मुखेल अभियंते तशेंच हेरांक हाचेर खूबशे खेपे हांवें तापोवन काडलां. कला अकादमीच्या कामाची हांवें हाजेरी लावन पळोवणी केल्या. कांय दोश आसले तरी ते पयस करपाची जापसालदारी भौशीक बांदकाम खात्याची आसा. कला अकादमीचें काम सुरू आसतना भौशीक बांदकाम खात्याचे मंत्री बदल्ले, अशें गोविंद गावडे हांणी सांगलें.
आदिवासी कल्याण खात्याचेर केल्ल्या आरोपांक लागून तांचे मंत्तरीपद गेलें. हांवें केल्ल्या आरोपांचेर हांव ठाम आसा. कार्यावळीक शेतकी मंत्री रवी नायक आशिल्ले, खात्याचे अधिकारी आशिल्ले. हांचे कडेन वासपूस करून चवकशी करप शक्य आशिल्लें. आरोपांची चवकशी जावंक ना. हाका लागून आरोप खरे आशिल्ल्याचें सिद्ध जाता, अशें तांणी म्हणलें. चवकशी करिनासतना शिस्तभंगाची कारवाय करतल्यांचेर अजून कारवाय जावंक ना, अशें तांणी म्हणलें.
हांवें म्हज्या आरोपांत भ्रश्टाचाराचो उल्लेख करूंक ना वा मुख्यमंत्र्यांचें नांव घेवंक ना. आरोपांचो अनर्थ केलो आनी बातम्यो आयल्यो. आदिवासी भवन अजून जायना. हें भवन कित्याक जायना, हाची चवकशी जावपाक जाय. आदिवासीं खातीर अटल आसरा, अंत्यसंस्कार ह्यो ज्यो येवजण्यो आसात, तांचो लेगीत लाव मेळपाक उशीर जाता. 2017 ते 2022 मेरेन हांव आदिवासी कल्याण खात्याचो मंत्री आशिल्लों. म्हजे कडेन हें खातें आशिल्लें जाल्यार हांव निश्चितपणान आदिवासी भवना सयत हेर येवजण्यांची कार्यवाही करतलों आशिल्लों अशें गोविंद गावडे हांणी म्हणलें.
भारतीय जनता पक्षाचे सरकार हाडपाक म्हजो वांटो आसा. वावर करून आनी दुख्खांत आदार दिवन हांवें मतदार जोडल्यात. मुख्यमंत्री डॉ. प्रमोद सावंत हे म्हजे पयली इश्ट आशिल्ले आनी फुडेंय उरतले, अशें तांणी सांगलें.
पक्षान उमेदवारी दिली ना जाल्यार येत्या ते वेंचणुकेत किदें भुमिका आसतली हे विशीं स्पश्ट उलोवपाक तांणी न्हयकार दिलो.
सभापती रमेश तवडकार हे म्हजे इश्ट आसात. आमी दोगूय एकाच ताटांत जेवपी मनीस. माशेलांत जाल्ले कार्यावळींत हांवें तांकां येवकार लेगीत दिला, अशें गोविंद गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
