भांगरभूंय | प्रतिनिधी
गावडे हांणी मगो आड भाजपा कडेन केल्ले कागाळेचेर प्रतिक्रिया
भांगरभूंय । प्रतिनिधी
पणजीः आमदार गोविंद गावडे हांचे आड मगोचे वावुरपी वावुरल्यात जाल्यार हातूंत आमचो हात ना. पूण ज्या मनशान आमच्या पक्षाक अपशब्द वापरल्यात, ताचे वांगडा आमी कशेच रावचे नात. अशें आमी भाजपा पक्षश्रेश्ठींक सांगलां अशें मगोचे आमदार सुदीन ढवळीकार हांणी सांगलें.
झेडपी वेचणुकेंत वेलींग-प्रियोळ मतदारसंघात मगो पक्ष भाजपाचे उमेदवारां आड वावुरल्यात अशीं कागाळ गोविंद गावडे हांणी भाजपाचे गोंय प्रभारी बी. एस. संतोष हांचे कडेन केल्ली. हे विशीं प्रतिक्रिया दितना ढवळीकार उलयताले.
वेंचणूक जावचे पयलीं भाजपाचे जे श्रेष्ठी आसात तांकां वेलींग प्रियोळ मतदारसंघ मगो पक्षाक दिवपाची मागणी केल्ली. पूण तो दिवंक नाशिल्ले कारणान आमचे कार्यकर्ते तांचे वांगडा रावपाक तयार नाशिल्ले, अशें स्पश्टीकरण ढवळीकार हांणी दिले.
आमची ह्या मतदारसंघात युती आसा. ह्या मतदारसंघात उबे राव नाकात अशें आमी सांगिल्लें. जर ते रावल्यात आसत जाल्यार तो आमचो भाग न्हय. तशेंच युती करचे वेळार आमी तशेंच कार्यकर्त्यांनी सांगिल्ले जो आमच्या शिंवाक अपशब्द वापरतात तो मनीस आमका लागना, अशें ढवळीकार हांणी म्हणलें.
आमची निशाणी शिव ही आमची देवी नवदुर्गा आनी महालक्ष्मी देवीचे वाहन आसा. त्या शिवांक ह्या मनश्यान अपशब्द वापरल्यात. त्या शिवाय आमचे पालक- आवय आनी बापूय तांचे आड अपशब्द वापरल्यात. देखून अशा मनशां बरोबर केन्नाच रावचे नात आनी ह्यान फुडेंय रावचे नात अशें स्पश्ट जे कोणाक सांगपाक जाय तांकां सांगलां, अशें रजांव ढवळीकार हांणी दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
