भांगरभूंय | प्रतिनिधी
त्या भायर फाटलीं 13 वर्सां काँग्रेस सत्ते बगर दीस काडटा. अशें जातकच मागीर कार्यकर्ते बेजारतात, फुडारी बेजारतात आनी पक्ष कोसळपाक लागता.
काँग्रेसीन काल ‘पक्षांतरा’च्या विरोधांत काळो दीस पाळ्ळो. 14 सप्टेंबर 2022 वर्सा ज्या ज्या काँग्रेसीच्या आमदारांनी पक्षांतर करून भाजपांत प्रवेश केलो, तांच्या आड तांणी काल त्या त्या तालुको पांवड्यार आवाज उठयलो आनी ह्या आमदारांक फुड्ल्या विधानसभा वेंचणुकेंत लोक घरा धाडटलेच अशी शिटकावणी दिली. अशे शिटकावणेचो विस्वास तांकां खंयच्यान आयलो असो प्रस्न पडूं येता. घडये 2019 त तांचे जे 10 आमदार फुटून भाजपांत गेल्ले, तातूंतले सात जाण हारिल्ल्यान काँग्रेसीक मुखारय अशेंच घडटलें अशें दिसता. लोकशायेचो चलिल्लो खेळ बंद करपाचें मतदारांनी चितल्यार तशें घडतय बी.
काँग्रेसीक ह्या पक्षांतरांचें खूब व्हडलें लुकसाण जालां. दोन फावट तांकां सरकार घडोवपाक मेळ्ळें ना आनी वयल्यान लोकां कडल्यान आयकुवचें पडलें. आमी काँग्रेसीक मत मारल्यार ‘आमदार’ भाजपांत वतात अशे थोमणे तांकां आयकुवचे पडल्यात. त्या भायर फाटलीं 13 वर्सां काँग्रेस सत्ते बगर दीस काडटा. अशें जातकच मागीर कार्यकर्ते बेजारतात, फुडारी बेजारतात आनी पक्ष कोसळपाक लागता. पूण पयरच्या लोकसभा वेंचणुकेन तांकां परत जीवे केल्यात अशें म्हणल्यार अतिताय जावची ना. दक्षिणेंतल्यान भाजपाची उमेदवार पल्लवी धेंपे हांकां हारोवन काँग्रेसीचो कॅप्टन विरियटो फेर्नांडीस जिखून आयलो. पूण हे खातीर काँग्रेसीन चड खोशी जावपाची गरज ना. तांकां इंडिया आघाडीच्या हेर पक्षांचो तेंको आशिल्लो हें तांणी विसरूंक फावना. आमदार सोडून गेले जाल्यार पक्षाक जबाबदार धरप हें समा न्हय, कारण पक्षांतर करपाक सोदपी आमदार आपलो ‘फायदो’ पळोवनूच उडी मारता. ती उडी मारतना तांचीं धोंपरांय फुटनात आनी पांय लेगीत मोडनात. कित्याक तर सत्तेंत प्रवेश घेतनाच तांकां वेगवेगळें ‘विटामीन’ मेळटा.
काँग्रेसीन तांकां धडो शिकोवपाक अपात्र याचिका घाल्यो. मात सभापती रमेश तवडकार त्यो निकालांत काडिनात असो तांचो आरोप आसा. तांच्या म्हणण्या प्रमाण सर्वोच्च न्यायालयाच्या आदेशा प्रमाणें याचिका दाखल करतकच 90 दिसां भितर निकाल येवंक जाय. पूण हो निकाल 2019 आनी 2022 ह्या दोनूय घडणुकांनी आयलो ना. आतां नोव्हेंबर मेरेन ही याचिका निकालांत काडची असो आदेश सर्वोच्च न्यायालयान दिला. काँग्रेसचे ज्येश्ट फुडारी गिरीश चोडणकार सध्या ही याचिका घालून सत्ते वांगडा झुजतात.
2022 वर्सा 8 जाणांनी भाजपांत प्रवेश घेतिल्लो. तातूंत आदले मुखेलमंत्री दिगंबर कामत, काँग्रेसचे तेन्नाचे विरोधी पक्ष फुडारी मायकल लोबो, दिलायला लोबो, केदार नायक, संकल्प आमोणकार, राजेश फळदेसाय, आलेक्स सिक्वेरा आनी रुडोल्फ फर्नांडीस हांचो आसपाव आसा.
हातूंतल्या कोणें कोणें आपूण मंत्री जातलो, मुख्यमंत्री जातलो हें मतदारांक सांगिल्लें खबर ना. मात एकल्याची घरकान्न ‘आमचो हो मुख्यमंत्री’ जातलो अशें लोकांक सांगताली अशी वावडी आसा. पक्षांतर करून काल दोन वर्सां जालीं. पूण देवा कडेन उलोवपी मुख्यमंत्रीय जाले नात आनी मंत्रीय जालेनात. मुख्यमंत्री प्रमोद सावंत सारक्या पिरायेन कमी आशिल्ल्या फुडाऱ्या खाला वरिश्टांक काम करचें पडटा, हें तांच्या मनाक खाता काय खबर ना.
ह्या पक्षांतर केल्ल्या आमदारां सारकेच तांचे कार्यकते मंत्रिमंडळ बदलाची फाटलीं दोन वर्सां वाट पळयतात. चवथी उपरांत, दिवाळे उपरांत, नातलां उपरांत, अधिवेशनां उपरांत मंत्रिमंडळांत फेरबदल जातले अशें फाटलीं दोन वर्सां आयकतात. मात तशें जालें ना. फकत नुवेचे आमदार आलेक्स सिक्वेरा हांकां मात भाजपान मंत्रिमंडळांत स्थान दिलां. ताचें कारण लोकसभा वेंचणूक आशिल्ली काय आलेक्सबाब फुगार जाल्लो हें खबर ना. अजूनय खूब जाणांक दिसता की मंत्रिमंडळांत बदल जातले आनी जांचेर भ्रश्टाचाराचे आरोप जाल्यात तांकां काडटले आनी पक्षांतर केल्ल्यांक भितर घेतले.
गोंय पर्यटना खातीर फामाद, तशेंच राजकारणा खातीरय. हेच खातीर तर 1963 ते आतां मेरेन 30 मुख्यमंत्री बदल्ल्यात आनी पांच फावट राष्ट्रपती राजवट लायल्या. 2019 त काँग्रेसीचो विरोधी पक्ष फुडारी चंद्रकांत कवळेकार फुटलो आनी 2022 त विरोधी पक्ष फुडारी मायकल लोबो फुटलो. कवळेंकार 2022 चे वेंचणुकेंत पडलो. आतां 2022 त फुटिल्ले खंयचे खंयचे आमदार 2027 पडटले हाचीं गणितां सध्या सुरू जाल्यांत…
दिश्टीकोन
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
