भांगरभूंय | प्रतिनिधी
पं. जवाहरलाल नेहरू हांची आयज जयंती. ते निमतान तांच्या व्यक्तीमत्वाचेर घाल्लो उजवाड.
भारतांतल्या मनीस रत्नां मदलें एक रत्न, जें कोहिनुराच्या तोडीचें सोबतलें अशे म्हान व्यक्तीमत्व जावन आसा, भोवमानेस्त पं. जवाहरलाल नेहरू.
पं. नेहरु हांचो जल्म 14 नोव्हेंबर 1889 दिसा इलाहाबादेंत जाल्लो. बापूय मोतिलाल हे व्हड देशभक्त. तांची किर्त चोंय वटांनी फाकारिल्ली. अशा देशभक्ताक जाल्लो चलो जवाहर म्हणल्यार ‘कांचनरत्न’ योग म्हणूंक जाय. नेहरू घराण्याक दुर्मीळतायेन मेळिल्लें तें वरदान खूब व्हड, श्रेश्ठ आसा हातूंत दुबाव ना.
पं. नेहरुंचें घराणें गर्भश्रीमंत. एखाद्या राजा सारको तांच्या बापायचो राबित्याचो थाट आशिल्लो. जवाहर हांचोय. सगले तरेच्यो सुविधा, गिरेस्तकायेन हें घराणें परिपूर्ण आशिल्लें. अशे श्रीमंतींत सुखासनाचेर लोळपी जवाहरलाल भारताच्या स्वातंत्र्या खातीर, भारताच्या उत्कर्शा खातीर अखंडीत कार्यरत आशिल्ले, हें अजाप म्हणूंक जाय. नेहरु हे ल्हानपणांत हेर भुरग्यां वरी शिकपा खातीर शाळेंत वचूंक नाशिल्ले. तांकां शिकोवंक ब्रुक्स नांवाचे विद्वान शिक्षक घरा येताले. शाळेंतलें सगलें शिकप तांकां तेच शिकयताले. पिरायेच्या सोळाव्या वर्सा जवाहरलालांक इंग्लंडांतल्य हॅरो स्कूलांत धाडिल्ले. उपरांत ते केंब्रिजाच्या ट्रिनीट काॅलेजींत शिकले. 1912 वर्सा ते बॅरिस्टर जाले. उपरांत इलाहाबादांत येवन तांणी 1920 मेरेन आदवोगासी केली. ब्रिटीश सरकारा आड त्या काळांत असहकाराची चळवळ सुरू जाल्ली. ती पळोवन तांणी वकिलीची प्रॅक्टीस सोडून चळवळींत सक्रीय वांटो घेतलो.
चळवळींत आसतना तांणी ‘इंडिपेंडेंट’ ह्या दिसाळ्यांत काम केलें. तातूंत प्रभावी अशें लिखाणूय केलें. त्याच वेळार तांणी अयोध्येंतल्या शेतकारां खातीर शेतकार चळवळीची बुन्याद घाली. देशभक्तीच्या होमखणात उडी घेतकच तांणी स्वताची पर्वा केली ना. तांच्या ह्या त्यागाक लागून महात्मा गांधीजींचो तांचेर विस्वास बशिल्लो.
नेहरु चळवळींत वांटेकार जातकच तांकां जायते खेपे बंदखणीची ख्यास्त जाली. त्या वेळार तांकां खूब हाल, त्रास सोंसचे पडिल्ले. पूण तांकां भारताच्या फुडाराचो हुस्को आशिल्लो. विशेश म्हणल्यार चळवळ करतनाच तांणी जायती साहित्य निर्मिती केली. तांणी बरयिल्ली आपजीण खूब लोकप्रीय जाल्या. ‘डिस्कव्हरी आॅफ इंडिया’ हें तांचें पुस्तक म्हणल्यार भारताचो इतिहास मानतात. ताचेर आदारीत ‘भारत एक खोज’ ही सोबीत माळ 1980 च्या दशकांत दूरदर्शनाचे खूब गाजिल्ली.
पं. नेहरू हांकां स्वतंत्र भारताचे पयले प्रधानमंत्री जावपाचो भोवमान मेळिल्लो. इंदिरा ही तांची चली. ते जंय जंय वताले थंय थंय तांची ही माणकुली चली वताली. जाका लागून ल्हानपणांतूच तिका राजकारणाची वळख जाल्ली. पं. नेहरु जेन्ना बंदखणींत आशिल्ले तेन्ना तांणी इंदिरेक बरयिल्लीं पत्रां म्हणल्यार मार्गदर्शनाचें गांठवल कशें…. हीं तांचीं पत्रां पुस्तक रुपांत उडवाडाक आयल्यांत. तीं आयजूय खूब देखदिणीं आसात.
पं. नेहरु गोंयांतुय आयिल्ले. त्या वेळार तांणी गोंयां विशीं केल्लीं विधानां दरेका गोंयकारांक आत्मपरिक्षण करुंक लावपी आसात. ‘अजब है ये गोवा के लोग’ हें तातुंतलेंच एक विधान. संवसारांत शांती आसची हे खातीर तांणी केल्ले यत्न मोलादीक आसात. महात्मा गांधीजींचें एक सपन आशिल्लें. तें आयज जिवीत आशिल्ले जाल्यार तें पुराय करपाचें श्रेय पं. नेहरूंक मेळपाचें. पूण तें जालें ना.
पं. नेहरुंक ल्हान भुरगीं खुब आवडटालीं. वेळांत वेळ काडून ते भुरग्यां बाराबर सारताले. त्याच खातीर दरवर्सा 14 नोव्हेंबराक हो तांचो जल्मदीस बालदिन म्हूण मनयतात. तांकां तांबड्या गुलाबाचें फूल खूब आवडटालें. म्हणून तांच्या शर्टाच्या बुतावांक सदांच तांबडो गुलाब आसतालो.
1955 वर्सा ‘भारत रत्न’ हो सर्वोच्च पुरस्कार तांकां भेटयिल्लो. 1961 वर्सा तांणी गोंयांत लश्कर धाडून गोंय पुर्तुगेजांच्या शेकांतल्यान मुक्त केलें. अशें हें आगळें व्यक्तीमत्व 27 मे 1964 दिसा भारतीय जनतेक पोरकें करून अनंतांत विलीन जावन अमर जालें.
– एन. सुहास
99210 16373
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
