भांगरभूंय | प्रतिनिधी
निलेश, दिगंबर, संकल्प, मायकल, डिलायला जावं येतात मंत्री
भांगरभूंय । प्रतिनिधी
पणजी : मंत्रीमंडळांत फेरबदल जावपाच्या विशयाक फुडल्या 15 दिसांनी पूर्णविराम लागतलो. आमदार निलेश काब्राल, दिगंबर कामत, संकल्प आमोणकार, डिलायला लोबो, माकयल लोबो हांच्या नांवांचो मंत्रीपदा खातीर विचार जावं येता, अशें सभापती रमेश तवडकार हांणी काणकोणां पत्रकारां कडेन उलयतना स्पश्ट केलें.
गोंय मंत्रीमंडळांत फेरबदल तशेंच मंत्र्यांच्या खात्यांनी बदल जातलो, अशी चर्चा फाटलीं अडेज वर्सां चल्ल्या. फाटले विधानसभा वेंचणुकेच्या निकाला उपरांत फक्त स म्हयन्यांनीच काँग्रेसीच्या आठ आमदारांनी भाजपांत प्रवेश केले उपरांत हे चर्चेक नेट आयिल्लो. काँग्रेसींतल्यान आयिल्ल्या आठांतल्या उण्यांत उण्या तीन आमदारांक मंत्रीपदाची सोर्त लागतली, अशी शक्यताय राजकी मळार उक्तायताले.
मुख्यमंत्री डॉ. प्रमोद सावंत आनी खासदार तशेंच आदले भाजपा प्रदेशाध्यक्ष सदानंद शेट तानावडे हांणी लेगीत सुरवातीच्या काळांत मंत्रीमंडळांत फेरबदल जातलो अशे संकेत दिल्ले. ते उपरांत चवथ, दिवाळी अश्या सणांक लागून मंत्रीमंडळ फेरबदल फुडे धुकल्ला, अशेंय स्पश्टीकरण ते दिवपाक लागले. फाटले लोकसभा वेंचणुकेचे आदीं मात राजकी गणितां मांडून भाजपान निलेश काब्राल हांकां मंत्रीमंडळांतल्यान काडून काँग्रेसींतल्यान आयिल्ले आलेक्स सिक्वेरा हांकां मंत्रीपद दिलें. त्याच वेळार हेर दोग आमदारांक लेगीत मंत्रीपदाची आस्त आशिल्ली. पूम पक्षान त्या वेळार तांचो विचार करूंक नाशिल्ल्यान तांचे मदीं निरशेवणी पातळ्ळी. मजगतीं, कांय म्हयन्यां आदीं मुख्यमंत्री डॉ. सावंत हांणी मंत्रीमंडळांत सध्या तरी बदल जावचो ना, अशें स्पश्ट केल्लें. पूण, कांय दिसां आदीं केंद्रीय पांवड्याचेर पक्षाचीं ध्येय धोरणां आंखपांत म्हत्वाची भुमिका आशिल्ले भाजपाचे राष्ट्रीय सरचिटणीस बी. एल. संतोष गोंयांत येवन गेले. गोंय भोंवडेंत तांणी मुख्यमंत्री डॉ. सावंत हांचे सयत पक्षाच्या ज्येश्ठ फुडाऱ्यां कडेन वैयक्तीक चर्चा लेगीत केली. गे फाटभुंयेर, सभापती तवडकार हांणी फुडल्या 15 दिसांत गोंय मंत्रीमंडळांत फेरबदल जातले आनी ते खातीर निलेश काब्राल, दिगंबर कामत, संकल्प आमोणकार, डिलायला लोबो आनी मायकल लोबो हांच्या नांवांचो विचार जावपाक शकता, अशें म्हणिल्ल्यान मंत्रीमंडळ फेरबदलाची शक्यताय वाडल्या.
बरें खातें मेळ्ळ्यारूच घेतलों : तवडकार
बरीं खातीं मेळटात जाल्यार आपूण मंत्रीपद घेतलों. ना जाल्यार आपूण सभापतीपदाचेरूच समाधानी आसा, अशें रमेश तवडकार हांणी सांगलें. पत्रकारांनी तांकां तुमी मंत्रीपदा खातीर इत्सूक आसात व्हय, असो प्रस्न केल्लो.
खंयच्याय खिणाक जावं येता फेरबदल : दामू
भाजप प्रदेशाध्यक्ष दामू नायक हांचे कडेन मंत्रीमंडळ फेरबदला विशीं संपर्क केलो तेन्ना तांणी सांगलें, बी. एल. संतोष गोंयांत आयिल्ले. त्या वेळार सध्याचे मंत्री आनी आमदारांच्या कामाचें प्रगतीपुस्तक आपणे तांकां सादर केलां. ताका लागून मंत्रीमंडळांत खंयच्याय खिणाक बदल जावं येता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
