भांगरभूंय | प्रतिनिधी
भांगरभूंय । प्रतिनिधी
केंपेंः देशांतल्या ल्हान आनी पारंपरीक वेवसाय करतल्यांक मजत करपा खातीर पंतप्रधान नरेंद्र मोदी हांणी पंतप्रधान विश्वकर्मा येवजण चालीक लायल्या. गोंयांत आतां मेरेन हे येवजणे खाला 28 हजार 200 जाणाची नांव नोंदणी जाल्या. तातूंत कुडचडें मतदारंसघांतल्या 200 जाणांचो आसपाव आसा. 4 हजार जाणांक प्रशिक्षण दिवपाक सुरू केलां अशी म्हायती आदलो बांदकाम मंत्री आन कुडचड्याचो आमदार नीलेश काब्राल हाणे दिली.
कुडचड्यांत रवींद्र भवमान पंतप्रधान विश्वकर्मा येवजणे संबदीचो परिसंवाद आनी जाग्रुती कार्यावळींत ते उलयतालें. ह्या वेळार कुडचडें- काकोडें पालिकेचो नगराध्यक्ष प्रदीप नायक, सरपंच कविता गांवस देसाय, नगरसेवक विश्वास सावंत, प्रसन्ना भेंडें, एम के मीनी, धवल जाधव हाजीर आशिल्लो. गोयांतले ल्हान वेवसायीक आनी कलाकारांक फावो तो मान तशेंच तांच्या पारंपरीक वेवसायाक नेट मेळचो आनी ते तिगून रावचे व्हो विश्वकर्मा येवजणेचो हेत आसा. तिचे वरवीं पारंपरीक वेवसाय करतात तांका उण्या कळंतरान रीण उपलब्द करुन दितात. वेवसाय वाडोवपा खातीर ताचो फायदो घेवपाचें आवाहन काब्राल हाणे संबंदितांत केला.
पंतप्रधान विश्वकर्मा येवजणे खातीर कुडचडे- काकोडें पालिका वाठारांतल्या 648 जाणानी अर्ज केल्यात अशी म्हायती नगराध्यक्ष प्रदीप नायक हाणे दिली. कार्यावळींत वेगवेगळ्या कारागिरांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
