भांगरभूंय | प्रतिनिधी
भांगरभूंय । प्रतिनिधी
म्हापशेंः गुजरांतल्या मोरबी हांगचो झुलतो पूल कोसळ्ळो हाची नेतीक जापसालदारी घेवन पंतप्रधान नरेंद्र मोदी, गृहमंत्री अमित शहा तशेंच गुजरातच्या मुख्यमंत्र्यान राजिनामो दिवपाक जाय अशें प्रदेश काँग्रेसाचो म्हणयारो संजय बर्डे हांणी सांगलां. हे दुर्घटनेंत मेल्ल्ल्यांच्या घरच्यांक फकत दोन लाख रुपये दिवपी भाजपा सरकाराक लोकांची जीव इतलो सवाय आसा अशें दिसता कांय कितें, असो प्रस्न तांणी केला.
म्हापश्यांत पक्षाच्या कार्यालयांत घेतिल्ले पत्रकार परिशदेंत ते उलयातले. ह्या वेळार पक्षाचे फुडारी विजय भिके आनी उत्तर गोंय जिल्हो अध्यक्ष विरेंद्र शिरोडकार हाजीर आशिल्ले. मोरपी पुलाक मोरबी नगर परिशदेन फिटनेस प्रमाणपत्र दिवंक नाशिल्लें. प्रशासकीय पांवड्या वयल्यान ताचें नूतनीकरण करून मोदी हांचे हस्तुकीं ताचें उक्तावण केल्लें. पांच दिसां भिरत हो पूल कोसळ्ळो. नूतनीकरण करपा खातीर अडेज कोटी रुपये खर्च केल्ले. ब्रिटीश तेपा वयल्या ह्या पुलाची फावो तशी दुरूस्ती जाली ना, जालो तो फकत भ्रश्टाचार अशें हे दुर्घटनेंतल्यान सामकार आयलां अशें बर्डे हांणी सांगलें.
गोंयांत अशी दुर्घटना जावची न्हय हे खातीर राज्य सरकारान नव्या झुवारी पुलाची शंबर फावट तरी चांचणी करून हो पूल येरादारीक उक्तो करपाक जाय अशें तांणी सांगलें. भाजपाचे गोंयांतले राजवटींत भ्रश्टाचार सगळे केडन पातळत चल्ला. कोविडाच्या तेपार ऑक्सिजन, वखदां, कडन्न, खेळां पदकां हातूंत भ्रश्टाचार जाल्लो. मंत्रिमंडळांतले मंत्री तशेंच आमदार भ्रश्टाचार करपाक लागल्या असो आरोप काँग्रेस फुडारी विजय भिके हांणी केला.
मुख्यमंत्री डॉ सावंत प्रशासकीय अधिकाऱ्यांक आपणे निलंबीत केल्ल्याचो दावो करतात. मुख्यमंत्र्यान तांची नांवा जाहीर करपाक जाय. जमीन घोटाळ्यांत लोक प्रतिनिधींचो आसपाव आसा. ताचेर कारवाय करपाक जाय. भ्रश्टाचाराक आळाबंद हाडपा खातीर सगल्या सरकारी कार्यालयांनी सीसीटीव्ही बसोवपाक जाय आनी तांची फुटेज दर सप्तकांत तपासून पळोवपाक जाय अशें तांणी सांगलें. राज्यांतल्या पर्यटन वेवसायाक बादिकारक थारपी प्रकारांचेर कारवाय जावपाक जाय. सरकार गैरकाम करपी पर्यटकां कडल्यान 5 तें 50 हजार रुपया दंड घेवपाचें जाहीर करता, मात तांचे खातीर जाय त्यो सुविदा तयार करपा कडेन मात आडनदर करता असो आरोप भिके हांणी पत्रकार परिशदेंत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
