भांगरभूंय | प्रतिनिधी
गोंयची वारकरी गौरी कुडतरकार हांकां मरण
भांगरभूंय । प्रतिनिधी
म्हापशें: आशाढी एकादशी निमतान गोंयांतल्यान शेंकड्यांनी श्री विठ्ठल माऊलीचे वारकरी भक्त चलत पंढरपूर विठूरायाच्या दर्शना खातीर वतात. अस्नोडेंच्यान पंढरपूराक वचपाक भायर सरिल्ले अशेच एके वारींतले वेगनार मोटारीक अपघात जालो. हे मोटारीक फाटले वटेंतल्यान धोफरायत आयिल्ले इनोव्हा मोटारीन नेटाचो धपको दिलो. ह्या अपघातांत वारींतली गौरी गुरुदास कुडतरकार (65. रा. आपा कॉलनी, करक्याचो व्हाळ, रेवोडें) हांकां मरण आयलें जाल्यार दोग जाण जखमी जाले.
हो अपघात शुक्रारा सकाळीं 11.45 वरांच्या सुमाराक कवठे महाकाल वाठारांत सोलापूर- सांगली राष्ट्रीय म्हामार्गार जालो. सुरेखा शिरोडकार (रा. आपा कॉलनी, करक्याचो व्हाळ, रेवोडें) आनी मोटार चालक साबाजी गाड (रा. मुळगांव) अशीं जखमींचीं नांवां आसात. सुरेखा हिच्या हाताक जाल्यार साबाजी हांच्या कमरेक गंभीर दुखापत जाल्या. ह्या जखमींक थळाव्या हॉस्पिटलांत उपचारा खातीर दाखल केले.
अस्नोडेंच्यान भायर सरिल्ली ही वारी सोलापूर सांगली म्हामार्गार पावले उपरांत गौरी कुडतरकार हिची भलायकी इबाडली. ते खातीर तिका वारी वांगड आशिल्ले जीए 03 व्हाय 6136 नंबराचे वेगनार मोटारीच्या फाटल्या सिटार बसोवन ही वारी फुडें वताली. मोटारीच्या फुडल्या सिटाचेर सुरेखा शिरोडकार आनी चालक साबाजी गाड आशिल्ले. अपघात जाल्ले सुवातेर पावताच फाटल्यान धोफरायत आयिल्ले टीएस 07 जेएल 3339 नंबराचे तेलंगणांत नोंद केल्ले इनोव्हा मोटारीन नेटाचो धपको दिलो. ह्या धपक्याक लागून वेगनार मोटारींत फाटल्या सिटार बशिल्ली गौरी गंभीर जखमी जाली आनी तिका सुवातेचेरूच मरण आयलें, जाल्यार फुडल्या सिटार आशिल्ली सुरेखा आनी साबाजी ही जखमी जालीं. अपघाता उपरांत इनोव्हा मोटार रस्त्याचे कुशीक झिलींनी वचून रावली. थंयच्यान इनोव्हा चालक आनी भितरल्या हेर प्रवाशांनी मोटार थंयच सोडून घडणुकेचे सुवाते वयल्यान पळ काडलो. मजगतीं, सांजे उसरां इनोव्हा मोटार चालक हर्षीत पोरेड्डी (आंध्र प्रदेश) हाका कवठे महाकाल पुलिसांनी अटक केली.
अपघात जाताच वारींतल्या हेर वारकऱ्यांनी घडणुकेचे सुवातेर धांव घेतली आनी मोटारींत जखमी जावन पडिल्ल्या तिनूय वारकऱ्यांक भायर काडले. पूण गौरी कुडतरकार हांकां सुवातेचेरूच मरण आयिल्लें.
घडणुकेची म्हायती मेळटाच कवटे महाकाल पुलिसांनी घडणुकेचे सुवातेर धांव मारली आनी पंचनामो केलो. तशेंच जखमींक लागींच्या हॉस्पिटलांत उपचारा खातीर दाखल केले. पुलिसांक रातीं उसरां मेरेन दुबावीत मोटार चालक मेळूंक नाशिल्लो. ह्या अपघाताची म्हायती मेळटाच गौरी आनी जखमींची घरचीं कवटे महाकालचे दिशेन वचपाक भायर सरलीं.
15 जुलयाक पंढरपूर पावपाची आशिल्ली वारी
अस्नोडें ते पंढरपूर ही 14 दिसांची वारी 2 जुलयाक पंढरपूर वचपाक भायर सरिल्ली. शुक्रार हो हे वारीचो 11 वो दीस आशिल्लो आनी 15 जुलयाक ती पंढरपूर पावपाची आशिल्ली.
गौरीची आशिल्ली दुसरी पायी वारी
मरण आयिल्ली गौरी कुडतरकार ही पायी वारीक अंदूं दुसरे खेपे गेल्ली. ती 4 जुलयाक हे वारींत वांटेकार जाल्ली. गौरी हिच्या फाटल्यान लग्न जाल्लो पूत आनी लग्न जाल्ल्यो तीन धुवो असो परिवार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
