भांगरभूंय | प्रतिनिधी
नवी दिल्ली, खबरां संस्था : दिल्लीचे शिमेर पंजाब-हरियाणाच्या शेतकारांच्या आंदोलनाक आनीक नेट आयलो. खनौरी वाठारांत जाल्ले हिंसेंत एका तरणाट्या आंदोलकाक मरण आयलें. जाल्यार 12 पुलीस जखमी जाले. शिमे पलतडी वचपी आंदोलकांक पुलिसांनी आडावपाचो यत्न केलो तेन्ना हिंसेक सुरवात जाली. आंदोलकांक आडावपा खातीर हरियाणा पुलिसांनी दोळ्यांतल्यान दुकां येवपी धुंवराचो वापर केलो. तशेंच आंदोलकांनी मिरसांगेचो पिठो जळयिल्ल्यान पुलिसांक खूब त्रास जाल्ल्याचो दावो अधिकार्यांनी केलो.
आयतारा रातीं सरकारा वांगडा जाल्ले चवथे चर्चेंत कांयच उपाय येवंक नाशिल्ल्यान बुधवारा शेतकरी संघटणांनी परतून ‘चलो दिल्ली’ आंदोलनाचो उलो मारिल्लो. ते प्रमाण सकाळीं ट्रॅक्टर, ट्रक अशा गाडयां सयत शंभू, खनौरी शिमेचेर आशिल्ले शेतकार दिल्ली गेले. दिल्ली पुलिसांनी उबारिल्ली तटबंदी मोडून आंदोलकांनी राजधानींत भितर सरपाचो यत्न केलो. तांकां आडावपा खातीर हरियाणा पुलिसांनी खनौरी शिमेचेर व्हडा प्रमाणांत दुकां येवपी धुंवर सोडिल्लो तशेंच रबराच्यो गुळयोय मारिल्ल्यो. आंदोलक आनी पुलिसां मदीं मारामारीय जाली. हातूंंत सुभकरण सिंग (21) ह्या तरणाट्याक मरण आयलें. तो तरणाटो पंजाबच्या भटिंडा जिल्ह्यांतल्या बलोक गांवांत रावपी. 13 फेब्रुवारीक ‘दिल्ली चलो’ आंदोलन सुरू जाले उपरांत हो पयलो बळी. पटियालाच्या राजिंद्र हॉस्पिटलाचे वैजकी अधिष्ठाता एच. एस. रेखी हांणी दिल्ले म्हायती प्रमाण सुभकरण हाचे तकलेक दुखापत जाल्ल्यान ताका मरण आयलें. हेर दोगजाण जखमी जाल्यात आनी तांची भालायकी स्थीर आशिल्ल्याची म्हायती रेखी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
