भांगरभूंय | प्रतिनिधी
नवी दिल्ली, खबरां संस्था ः फाटल्या कांय दिसां सावन बायलांक मासिक पाळीच्या वेळार ऑफिसांतल्यान सुटी दिवची अशी मागणी सतत चलता. इतलेंच न्हय, कांय देशांनी बायलांक सुटी मेळटा. आतां एका राज्यांतल्या एका विद्यापिठान व्हडलो निर्णय घेतला आनी चलयांक मासिक पाळयेच्या वेळार सुटी दिवपाचें थारायलां. पूण ह्या निर्णया वांगडाच कांय अटीय घाल्यात.
पंजाब विद्यापीठान मासिक पाळयेच्या वेळार विद्यार्थिनींक सुटी दिवपाचो निर्णय घेतला. एक दीस सुटी मेळटली. हे खातीर अर्ज करचो पडटलो. विद्यार्थिनींक एका म्हयन्यांत एक सुटी ही मासिक पाळयेच्या वेळार मेळटली. पूण ही सुटी फकत वर्ग सुरु आसतनाच मेळटली.
परिक्षेच्या काळांत कोणाक ही सुटी घेवंक मेळची ना. तशेंच विद्यार्थ्यांक खंयच्याय कारणाक लागून ही सुटी वाडोवंक मेळची ना अशें आदींच स्पश्ट केला. हो नेम विद्यापिठान 2024- 2025 शिक्षणीक वर्सा खातीर चालीक लायला. हाका लागून मासिक पाळयेच्या वेळार विद्यार्थिनींक व्हडली सुटका मेळटली हें निश्चीत.
पंजाब विद्यापिठा पयलीं 2023 वर्सा केरळांतल्या कोचीन विद्यापिठान हो निर्णय घेतला. कोचीन विद्यापिठांत मासीक पाळये वेळार सुटी मेळटा. आतां पंजाब विद्यापिठान हो निर्णय घेतला.
कोचीन, पंजाब विद्यापिठा वांगडा हैदराबाद आनी हेर कांय विद्यापिठांनीय असोच निर्णय घेतला. असो निर्णय घेवपाची प्रक्रिया अजून कांय विद्यापिठां कडल्यान चालू आसा. मासीक पाळये वेळार त्रास जाता आसतना लेगीत चलयांक कॉलेजींत वचचें पडटा, तो त्रास जावचो न्हय हे खातीर हे निर्णय घेतला. तशेंच ब्रिटन, जपान, तैवान, इंडोनेशिया आनी झांबिया ह्या देशांनीय बायलांक पीरियड सुटी म्हळ्यार मासिक पाळीच्या वेळार सुटी घेवपाक मेळटा. स्पेनाचे संसदेन 2023 वर्सा बायलां खातीर व्हडलो निर्णय घेतलो आनी बायलां खातीर मासिक पाळी सुटी (Menstruation Leave) जाहीर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
