भांगरभूंय | प्रतिनिधी
अमृतसर, खबरां संस्था: पंजाबच्या अमृतसर जिल्ह्यांतल्या मजिठा भागांत विखारी सोरो पिवन १४ जाणांक मरण आयलें. जाल्यार हेर ६ जाणांची भलायकी सामकी वायट आसा. हे सगले लोक अमृतसरच्या सरकारी हॉस्पिटलांत दाखल आसात. ते उलोवपाचे स्थितींतूय नात. मरण आयिल्ल्यांचो आंकडो आनीक वाडपाक शकता, असो भंय प्रशासनाक आसा.
मरण आयिल्ल्यां मदीं भांगाली कलान, मार्डी कलान आनी जयंतीपूर ह्या तीन गांवांतल्या लोकांचो आसपाव आशिल्लो. हे घडणुके उपरांत पुलीस आनी प्रशासन सक्रीय जालां. विखारी सोरो विक्रेच्या आरोपा खाला पुलिसांनी पांच जाणांक ताब्यांत घेतल्यात. तांची चवकशी सुरू आसा. विखारी सोरो खंयच्यान आनी कसो आयलो हाचो सोद घेवप प्रशासनान सुरू केलां. पंजाबांत फाटल्या तीन वर्सांनी घडिल्लो हो चवथो प्रकार जावन आसा.
पुलिसांनी धाड घालपाक सुरू केलां. पिडेस्त कुटुंबांतले एके बायलेन सांगलें, विखारी सोरो पियेले उपरांत पुताक ओंकारी येवपाक सुरू जालें. उपरांत हॉस्पिटलांत व्हरतना वाटेरूच ताका मरण आयलें. थळाव्या लोकांच्या म्हणण्या प्रमाण, ह्या वाठारांत बनावट सोर्याचो वेवसाय बर्याच काळा सावन चलतालो, मात प्रशासनान हाचेर कसलीच खर कारवाय करूंक ना.
आतां लोकांक मरण आयले उपरांत प्रशासनान कारवाय सुरू केल्या. संंबंदीत सुवातांचेर छापे घालपाक सुरवात केल्या.
मास्टरमायंडाक धरलो
विखारी सोर्याक लागून जाल्ल्या मरणा उपरांत पंजाब सरकारान खर कारवाय केली. बनावट सोरो रॅकेटाचो सुत्रधार प्रभजीत सिंग हाका पुलिसांनी अटक केली. अटक केल्ल्या हेर आरोपीं मदीं प्रभजीतचो भाव कुलबीर सिंग ऊर्फ जग्गू, साहिब सिंग ऊर्फ सराय, गुरजंत सिंग आनी निंदर कौर हांचो आसपाव आसा. सध्या ह्या पुराय नेटवर्कची चवकशी पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
