भांगरभूंय | प्रतिनिधी
पंजाब किंग्सान इंडियन प्रिमीयर लिगेच्या (आयपीएल) 16व्या हंगामाक जैतान सुरवात केली. पावसाची आडखळ आयिल्ले मॅचींत ताणें कोलकाता नायट रायडर्साक डकवर्थ-लुईस प्रमाण 7 धांवड्यांनी हारयलो.
मोहालीच्या पंजाब क्रिकेट असोसिएशनाच्या आय बी बिंद्रा स्टेडियमाचेर कालकाता नायट रायडर्सान टॉस जिखून पंजाब किंग्साक पयलीं बॅटींग करपाचें आमंत्रण दिलें. पंजाबान 20 ओव्हरींनी 5 विकेटी वगडावन 191 धांवड्यो केल्यो. मोखीचो फाटलाव करतना 16 ओव्हरींनी 7 विकेटी वगडावन 146 धांवड्यो केल्ल्यो. तेन्नाच पावस आयलो आनी खेळ थांबोवचो पडलो.
पंजाब किंग्सान सांघीक खेळा नेटार जैत जोडलें. भानुका राजपक्षा आनी मुखेली शिखर धवन जबरदस्त बॅटींग करून व्हड धांवसंख्या उबारून दिली. ते उपरांत अर्शदीप सिंगान परतून एकदा बॉलिंगेंत बरें प्रदर्शन केलें. ताका हेर बॉलरांनी बरी साथ दिली. पूण, कोलकाताच्या आंद्रे रसेलान आक्रमक बॅटींग केल्ल्यान पंजाबाच्या पंगडांत हुस्को निर्माण जाल्लो. पूण, पावन पंजाबाचे मजतीक धांवन आयलो.
स्टेडियमाच्यो लायटी बंद पडिल्ल्यान दुसरो डाव मात्सो उसरा सुरू जालो. रहमनुल्लाह गुरबाज हाणें पयलेच ओव्हरींत सको मारलो. पूण, अर्शदीप सिंगान ताचे पयलेच ओव्हरींत मनदीप सिंग (2) आनी अनुकूल रॉय (4) हांकां बाद केले. वेंकटेश अय्यर इम्पॅक्ट खेळगडो म्हणून मैदानांत देंवलो आनी ताणें बरो खेळ केलो. नॅथन एलिसान गुरबाजाक (22) बोल्ड केलो. मुखेली नितीश राणा आनी वेंकटेश हांणी 46 धांवड्यांची भागिदारी करतना कोलकाताचो डाव सांबाळपाचो यत्न केलो. पूण, सिकंदर रझान राणाक (24) बाद करून ही जोडी फोडली.
आंद्र रसेल आक्रमक बॅटींग करपाचो निर्धार करूनूच मैदानाचेर देंविल्लो. 20 धांवड्यांचेर प्रभसिमरनान ताची कॅच सोडली. सॅम करनान कोलकाताक मोठो धपको दितना 19 बॉलांनी 35 धांवड्यो करपी रसेलाक बाद केलो. पूण, ते उपरांत आयिल्ल्या शार्दुल ठाकुरान पयल्याच बॉलाचेर सको मारलो. कोलकाताक 30 बॉलांनी 56 धांवड्यो करपाच्यो आशिल्ल्यो आनी चार विकेटी हातांत आशिल्ल्यो. अर्शदीपान परतून एकदा आपल्या पंगडाचे मजतीक धांवन येतना वेंकटेश अय्यराक (34) बाद करून पंजाबाचें जैत लागींलागीं निश्चीत केलें. सुनील नरीन आनी शार्दुल हांच्या कडल्यान कोलकाताच्या चाहत्यांक आस्त आशिल्ली. 16वे ओव्हरी उपरांत पावसाक लागून खेळ थांबलो आनी डीआरएसा प्रमाण पंजाबाक 7 धांवड्यांनी जैत फावो जाले.
ते पयलीं भानुकाचो अर्द शेंकडो आनी शिखर धवनाची संयमी खेळी सोडली जाल्यार पंजाबाच्या हेर बॅट्समनांक खाशेलें प्रदर्शन करपाक जमलें ना. भानुकान कोलकाताच्या बॉलरांची बॉलींग फोडून काडटना 32 बॉलांनी पांच चवके आनी दोन सक्यांचे मजतीन 50 धांवड्यो केल्यो. तशेंच धवना (40) वांगडा 55 बॉलांनी 86 धांवड्यांची भागिदारी केली. जितेश शर्मान जलद रितीन धांवड्यो करपाचेर भर दिलो. ताणें 11 बॉलांनी 21 धांवड्यो केल्यो.
सॅम करन आनी सिकंदर रझा (16) ही जोडी पंजाबाचो स्कोर दोनश्यांच्या मुखार व्हरतलो अशें दिशिल्लें. पूण, सुनील नरेनान रझाक बाद केलो. पंजाबान 20 ओव्हरींनी 5 विकेटी वगडावन 191 धांवड्यो केल्यो. करनान 17 बॉलांनी 26 धांवड्यांचेर आनी शाहरुख 11 धांवड्यांचेर नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
