भांगरभूंय | प्रतिनिधी
चेन्नय सुपरकिंग्साक सेगीत चवथे हारीक तोंड दिवचें पडलें. पंजाब किंग्सान घरच्या मैदानाचेर खेळटना चेन्नय सुपरकिंग्साक 18 धांवड्यांनी हारयलो. ह्या जैता सयत पंजाबान गुणतकट्यांत पयल्या चारांनी सुवात मेळयली.
24 वर्सां पिरायेच्या प्रियांश आर्याचो शेंकडो मॅचींत म्हत्वाचें थारलें. ताका शशांक सिंग आनी मार्को यान्सेन हांच्या कडल्यान उपेगी साथ मेळ्ळी. पंजाबाच्या बॉलरांनी तांची भुमिका योग्य वठयतना चेन्नक हारोवपाक मोलादीक हातभार लायलो.
220 धांवड्यांचो फाटलाव करतना रचिन रवींद्र आनी डॅव्होन कॉन्वे हांणी चेन्नयक अपेक्षीत सुरवात करून दिली. हे जोडयेन 6.3 ओव्हरींनी 61 धांवड्यो करून दिल्यो. ग्लॅन मॅक्सवॅलाचे बॉलिंगेचेर मुखार येवन शॉर्ट खेळपाच्या यत्नांत रचिन (27) स्टम्प बाद जालो. मुखेली ऋतुराज गायकवाड (1) परतून अपेशी थारलो. शिवम दुबे बरें प्रदर्शन करपाक येसस्वी थारलो. दुबे आनी कॉन्वे हांणी 51 बॉलांनी 89 धांवड्यांची भागिदारी करून चेन्नयची आस्त जिवी दवरिल्ली.
25 बॉलांनी 69 धांवड्यांची गरज आसतना ल्युकी फर्ग्युसनान विकेट घेतली. दुबे 27 बॉलांनी तीन चवके आनी दोन सक्यां सयत 42 धांवड्यांचेर बाद जालो. ते उपरांत महेंद्रसिंग धोनी वयले सुवातेर बॅटिंगेक आयलो आनी पयल्याच बॉलाचेर धांवबाद जावपाची संद पंजाबाक दिली. पूण, पंजाबाक हाचो फायदो घेवपाक जमलो ना. धोनी मैदानांत आयल्या उपरांत पंजाबान युजवेंद्र चहलाक बॉल दिलो. 17वे ओव्हरींत ताणें पयली ओव्हर घाली. कॉन्वेन 37 बॉलांनी अर्द शेंकडो पुर्ण केलो.
धोनी आयलो त्या वेळार चेन्नयक जैता खातीर 22ची रन रेट जाय आशिल्ली. पूण, धोनीन ते दिश्टीन खेळ केलो ना. कॉन्वेक लेगीत व्हड शॉर्ट मारपाक जमूंक नाशिल्ल्यान 18वी ओव्हर पूर्ण जाल्या उपरांत तो रिटायर्ड आवट जालो. ताणें 49 बॉलांनी स चवके आनी दोन सक्यांनी 69 धांवड्यो केल्यो. धोनीन दोन सके मारून मॅचींत उमळशीक हाडली. तरी लेगीत चेन्नयक 12 बॉलांनी 43 धांवड्यो केल्यो. ताच्या वांगडा रवींद्र जडेजा मैदानांत आशिल्लो.
19वे ओव्हरींत धोनीची सोंपी कॅच सोडली. ते उपरांत धोनीन आक्रमक बॅटींग करून मॅचींत उमळशीक हाडली. पूण, यश ठाकूराच्या बॉलाचेर धोनी बाद जालो. अखेरेक चेन्नयक 5 बाद 201 धांवड्यो करप शक्य जाल्यो.
ते पयलीं प्रियांशान 103 धांवड्यांची आक्रमक बॅटींग केली. प्रभसिमरन सिंग (0), श्रेयश अय्यर (9), मार्कस स्टॉयनीस (4), नेहाल वढेरा (9) आनी ग्लॅन मॅक्सवेल (1) हे बॅट्समन अपेशी थारिल्ल्यान पंजाबाची अवस्था 5 बाद 83 अशी जाल्ली. पूण, प्रियांशान 42 बॉलांनी 7 चवके आनी णव सक्यांचे मजतीन 103 धांवड्यांची खेळी केली. ते उपरांत शशांक सिंगान 36 बॉलांनी दोन चवके आनी तीन सके मारून नाबाद 52 धांवड्यो केल्यो. ताका मार्को यान्सन हाणें बरी साथ दिली. ताणें नाबाद 34 धांवड्यो केल्यो. ताका लागून पंजाबाक 6 बाद 219 धांवड्यो करप शक्य जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
